Հեղափոխությունն ավարտված է. Газета-ի անդրադարձը՝ ընտրություններին

Ռուսական «Газета» պարբերականն անդրադարձել է ՀՀ-ում անցկացված արտահերթ խորհրդարանական ընտրություններին ու դրանց արդյունքներին՝ անվանելով դրանք «թավշյա հեղափոխության» տրամաբանական ավարտը:

«Հեղափոխությունն ավարտված է. Փաշինյանը վերցրեց հայաստանյան իշխանությունը» հոդվածում անդրադարձ է կատարվում այս տարվա ապրիլից սկսած ՀՀ-ում տեղի ունեցած զարգացումներին, որոնք հասան իրենց հանգուցալուծմանը խորհրդարանական ընտրություններով:

Պարբերականն ընտրությունների գլխավոր «սենսացիան» է անվանել Հանրապետական կուսակցության՝ խորհրդարան չանցնելը։

Նիկոլ Փաշինյանի՝ ընտրությունների գնալու համար վարչապետի պաշտոնից հրաժարական տալու քայլը՝ պարբերականի կողմից բավականին համարձակ քայլ է որակվում՝ չնայած այն աջակցությանը, որը քաղաքական գործիչը վայելում է երկրում և որը նրան տալիս էր որոշակի երաշխիքներ:

«Թեև իրադարձությունները զարգացան հենց նրա սցենարով: Մյուս կուսակցությունները չառաջադրեցին վարչապետի իրենց թեկնածուների, ինչից հետո խորհրդարանը երկու անգամ չընտրեց նախկին լրագրող թեկնածուին»,- շարունակում է պարբերականը՝ նկատելով, որ չնայած «թավշյա հեղափոխության» առաջնորդն արդեն ձեռնարկել է որոշակի կտրուկ քայլեր՝ նրա գլխավոր նախընտրական խոստումը շարունակեց մնալ կոռուպցիայի դեմ պայքարը։