Ադրբեջանն ապացուցում է՝ ԼՂ հարցի լուծման իր պատկերացումը պատերազմն է․ վարչապետ

ՀՀ վարչապետ Նիկոլ Փաշինյանը  «Զինուժ» հաղորդաշարին տված հարցազրույցում հայտարարել է` Գերագույն հրամանատարի կարևորագույն հատկությունը և հմտությունը դժվարության և օրհասական պահին հանրությանը, պետությանը, ժողովրդին, զինված ուժերին համախմբելու կարողությունն ու ընդունակությունն է:

«Ես կարծում եմ, որ սա այսօր մեր ռազմաքաղաքական ամենակարևոր առավելություններից մեկն է, որին ավելացել է նախկինում մեր ունեցած մյուս առավելությանը, ինչն էլ ուժեղ և մարտունակ բանակի առավելությունն է: Ադրբեջանը շատ երկար տարիներ իր դիրքորոշումներով ապացուցում է, որ իր պատկերացումը պատերազմն է՝ Լեռնային Ղարաբաղի հարցի կարգավորման»,-նշել է վարչապետը` ընդգծելով, որ որևէ մեկը չի կարող մեզ հետ սպառնալիքների, հարկադրանքի, ուժի լեզվով խոսել։

Ըստ Նիկոլ Փաշինյանի՝ սա նշանակում է, որ ոչ միայն Հայաստանի Հանրապետությունը, այլև ողջ հայ ժողովուրդը պետք է պատրաստ լինի՝ տալու անհրաժեշտ հակահարված, և որ որևէ մեկը չի կարող մեզ հետ խոսել սպառնալիքների, հակրադրանքների, ուժի լեզվով: «Մեր զինվորներին ուզում եմ ասել՝ դուխով»,- հավելել է վարչապետը։