2018 թվականին Ալեն Սիմոնյանն իր հպարտությունն էր հայտնում, իսկ այսօր քննադատում է․ Դավիթ Հակոբյան

Ես շատ լավ եմ հիշում, թե ինչպես էր 2018 թվականին Ալեն Սիմոնյանն իր հպարտությունը հայտնում, թե ինչպես է եկեղեցին միացել իրենց, բայց այսօր քննադատում է այդ եկեղեցուն, որը միացել է շարժմանը: Երևանի թատրոնի և կինոյի պետական ինստիտուտի մոտ, ողջունելով Բագրատ սրբազանի գլխավորած երթի մասնակիցներին, հայտարարեց վաստակավոր արտիստ, դերասան, բեմադրիչ Դավիթ Հակոբյանը: Նա կոչ արեց չտրվել կեղծ գաղափարախոսությանը, թե ինչ գործ ունի եկեղեցին երկրի ու պետականության հետ:

«Հիմա մեղադրում են, որ շարժումը ղեկավարում է եկեղեցին, սրբազանը: Ես պարզապես մի բան հիշեցնեմ, եթե չգիտեք պատմություն, եթե այսօր Ռուսաստանը որպես պետություն կա, և էլի շատ-շատ պետություններ, պարտական են միայն եկեղեցուն»,- նշեց նա:

Ողջունելով շարժմանն ու սրբազանին Դավիթ Հակոբյանը հայտարարեց, որ որպես դասախոս կարող է մեղադրել ուսանողներին դասերից բացակայելու համար, սակայն չի նախատում: «Աստված օգնական և պահապան Ձեզ: Երբեք ուշ չէ ինչ-որ լավ բան անել: Մնացածը սուտ է: Ազնիվ եղեք ինքներդ ձեր խղճի հետ: Սա կուսակցական շարժում չէ: Կարևորը համախմբվածությունն ու հավաքականությունն է»,- նշեց վաստակավոր արտիստը: Նա հիշեցրեց Չարենցի խոսքերը` մեր ուժը մեր հավաքականության մեջ է:

Նշենք, որ Երևանի թատրոնի և կինոյի պետական ինստիտուտի ուսանողները միացել են Բագրատ Սրբազանի առաջնորդած շարժմանը։