Փաշինյանը խճճվել է Մոսկվա-Բրյուսել-Վաշինգտոն տրանզիտի մեջ, փորձում է բավարարել բոլոր կողմերին․ Ագնեսա Խամոյան

«Հայաստան» խմբակցության պատգամավոր Ագնեսա Խամոյանի խոսքով՝  իշխանություններն  իրենց աթոռները փրկելու համար պատրաստ են ամեն ինչի։ «Նիկոլ Փաշինյանը խճճվել է  Մոսկվա-Բրյուսել-Վաշինգտոն տրանզիտիմեջ, փորձում է բավարարել բոլոր կողմերին և ոչ մեկին չնեղացնել։ Այս բոլոր հարթակներում Ադրբեջանին հաջողվում է հասնել իր նպատակին, սակայն հայանպաստ լուծման հասնել չի հաջողվում»,- ասաց պատգամավորը։

Նա անդրադարձավ նաև՝  Լաչինի միջանցքում ռուս խաղաղապահների պատասխանատվությանը՝ ընդգծելով, որ խաղաղապահները  պետք է կատարեն իրենց գործառույթները ևապահովեն Լաչինի միջանցքով անխափան տեղաշարժը։  Նա նշեց, որ ռուս խաղաղապահները նույնպես պատասխանատվություն են կրում Լաչինի միջանցքում տիրող իրավիճակի համար՝ հավելելով, որ միջանցքը պետք է բացվի։

Ագնեսա Խամոյանն անընդունելի  համարեց , որ Հայաստանի իշխանություններն ամբողջությամբ հրաժարվում են պատասխանատվությունից։ Նրա խոսքով՝ իրենք էլ են պատասխանատու. «Ակնհայտ է, որ Հայաստանում հակառուսական տրամադրություններ են նկատվում։ Եթե ​​ներկայիս իշխանությունները վերջնականապես փոխեն արտաքին քաղաքական վեկտորը, ապա դրա շարունակությունը կլինի ռուսական ռազմաբազայի դուրսբերումը Հայաստանից։  Սա տեղավորվում է Հայաստանի իշխանությունների տրամաբանության մեջ, երբ Թուրքիայի հետ բարիդրացիական հարաբերություններ են կառուցվում։ Ակնհայտ է, որ այս գործընթացի ավարտը, իրենց ընկալմամբ, պետք է լինի հենց ռուսական բազայի դուրս բերումը Հայաստանից»,- նշեց պատգամավորը։