Ինչո՞վ է զբաղված ՀՀ «նորընտիր» նախագահ Վահագն Խաչատ(ու)րյանը

Հայաստանի հանրապետությունը մարտի 13-ից նոր նախագահ ունի: Վահագն Խաչատուրյանը այդ օրը հանդիսավոր կերպով երդվեց «հավատարիմ լինել ՀՀ սահմանադրությանը, լինել անաչառ և առաջնորդվել համապետական շահերով»:

Դրան հաջորդեցին մի շարք իրադարձություններ: Մասնավորապես, հակառակորդը կարողացավ առաջխաղացում ունենալ Կապանի Ներքին Հանդ գյուղում՝ փաստացի խախտելով ՀՀ սուվերեն տարածքը: Մի քանի անգամ Արցախի բնակչությունը զրկվեց գազամատակարարումից: Արցախում սրվեց իրավիճակը, ադրբեջանական զինված ուժերը խախտեցին Արցախի շփման գիծը և ներխուժեցին Արցախի Փառուխ գյուղ։

Հակառակորդի ձեռնարկած սադրանքների, մասնավորապես` Bayraktar TB-2 տեսակի հարվածային անօդաչու թռչող սարքերի կիրառման հետևանքով զոհվեցին ՊԲ պայմանագրային զինծառայողներ Դավիթ Ռոբերտի Միրզոյանը (ծնվ. 1978թ.),  Իշխան Սերժիկի Օհանյանը (ծնվ. 1994թ.) և Արարատ Վագիֆի Թևոսյանը (ծնվ. 1990թ.):

Տեղի ունեցավ Փաշինյան-Ալիև հանդիպում և ձեռք բերվեցին պայմանավորվածություններ, որոնք ադրբեջանական կողմը գնահատեց որպես Բաքվի շահերից բխող:

Իսկ ի՞նչ էր անում այս օրերին ՀՀ նորընտիր նախագահը: Վահագն Խաչատուրյանն ակտիվ հանդիպումներ էր ունենում Hայաստանում հավատարմագրված դեսպանների հետ: Կմտածեք՝ ներկայացնում էր իրավիճակը Արցախի շուրջ, մտահոգություններ էր հայտնում, բայց ոչ, ծանոթանում էր:

Նա ներկա է գտնվել ակադեմիկոս Սերգեյ Համբարձումյանի ծննդյան 100-ամյակին նվիրված հանդիսավոր նիստին: Ապա շնորհավորական ուղերձ է հղել Սենեգալի նախագահ Մակի Սալին:

Վահագն Խաչատուրյանը հասցրել է նաև հանդիպել «Իմ քայլը» հիմնադրամի գործադիր տնօրեն Մխիթար Հայրապետյանին, ՀՖՖ նախագահ Արմեն Մելիքբեկյանին և փոխնախագահ Արմեն Նիկողոսյանին:

Այնուհետև հանդիպել է ԵՊՀ գիտական խորհրդի անդամների հետ և այցելել է «Զինվորի տուն» վերականգնողական կենտրոն: Ապրիլի 2-ին հարգանքի տուրք է մատուցել Ապրիլյան պատերազմի զոհերի հիշատակին:

Դե իսկ ապրիլի 7-ին էլ Նախագահ Վահագն Խաչատուրյանը Մայրության և գեղեցկության օրվա առթիվ հյուրընկալել է տարբեր բժշկական հաստատությունների մի խումբ կանանց: Եվ ըստ տարածված լուսանկարների՝ հասցրել է անգամ դաշնամուր նվագել նրանց համար:

Վերջում նորից հիշեցնենք երդման տեքստը և իր լիազորությունների մասին Խաչատուրյանի գնահատականը:

«Ստանձնելով ՀՀ նախագահի պաշտոնը՝ երդվում եմ՝ հավատարիմ լինել ՀՀ սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական և համազգային շահերով»:

«Հանրապետության նախագահի լիազորությունները բավական են, որպեսզի ինքը լիարժեք հանդես գա որպես իշխանության գլուխ»: