Բարձր առաջադիմություն ունեցող ոչ մի ուսանող ուսման վարձ չվճարելու պատճառով չի հեռացվի բուհից

Կառավարությունը հաստատեց կորոնավիրուսի տնտեսական հետևանքների չեզոքացման տասնչորսերորդ միջոցառումը, որը վերաբերում է ուսանողներին:

ԿԳՄՍ նախարար Արայիկ Հարությունյանը ներկայացրեց, որ միջոցառման շահառու են բուհերի առկա ուսուցմամբ վճարովի համակարգում սովորող բակալավրիատի, մագիստրատուրայի և կլինիկական օրդինատուրայի ավարտական կուրսի ուսանողները, որոնց հանրագումարային միջին որակական գնահատականը (ՄՈԳ) ուսումնառության սկզբից մինչև 2019-2020 թթ. ուսումնական տարվա 1-ին կիսամյակի ավարտը կազմում է ՄՈԳ-ի առավելագույն արժեքի 90 և ավել տոկոս: Նշված սովորողներին հատկացվում է 2019-2020 ուսումնական տարվա երկրորդ կիսամյակի ուսման վարձի 100% փոխհատուցում։

Պետության կողմից սուբսիդավորվող ծրագրում վարկերի տրամադրման նոր պայմաններ կլինեն այն ուսանողների համար, որոնց հանրագումարային ՄՈԳ-ը ուսումնառության սկզբից մինչև 2019-2020 թթ. ուսումնական տարվա 1-ին կիսամյակի ավարտը կազմում է ՄՈԳ-ի առավելագույն արժեքի 80 և ավել տոկոս, նոր տրամադրվող ուսումնական վարկերի տոկոսադրույքը 2020 թվականի մայիսի 1-ից մինչև 2020 թվականի դեկտեմբերի 31-ն ընկած ժամանակահատվածի համար ամբողջությամբ կսուբսիդավորվի պետության կողմից, որի արդյունքում այդ ժամանակահատվածի տարեկան տոկոսադրույքը կկազմի 0 տոկոս։

Վարչապետ Նիկոլ Փաշինյանը, դիմելով Կենտրոնական բանկի նախագահ Արթուր Ջավադյանին, հիշեցրեց, որ պայմանավորվել են, որ ուսանողական վարկերի տրամադրման կարգերը կհշետացվեն:

Արթուր Ջավադյանն ասաց, որ այս պահին 11 150 գործող վարկ կա, պայմանները բավականին հեշտացվում է բոլորի համար: Նա նշեց, որ վարկերի համար երաշխավորություններ ծնողների կողմից պետք չեն: «Վարկերի ստացման գործընթացն էլ է հեշատացվել»,-ասաց նա և նշեց, որ գրեթե հավանականություն չկա, որ ուսանողը դիմի վարկի համար և մերժվի:

«Այսպսով՝ կարող ենք արձանագրել, որ մեր այն քաղաքական հանձնառությունը, որ բարձր առաջադիմություն ունեցող ոչ մի ուսանող ուսման վարձ չվճարելու պատճառով չի հեռացվի բուհից, հարյուր տոկոսով կատարվում է»,- ամփոփեց վարչապետը: