20 11 2020

Հնարավորություն չեմ ունեցել օգտվելու իմ իրավունքներից, իրազեկել եմ ՄԻՊ-ին․ Տիգրան Աբրահամյան

Հնարավորություն չեմ ունեցել օգտվելու իմ իրավունքներից, իրազեկել եմ ՄԻՊ-ին․ Տիգրան Աբրահամյան

«Հենակետ» վերլուծական կենտրոնի ղեկավար Տիգրան Աբրահամյանն ազատ է արձակվել։ Իր՝ բերման ենթարկվելու եւ ոստիկանական բաժանմունքում գտնվելու մասին ֆեյսբուքյան իր էջում Տիգրան Աբրահամյանը գրել է։

«Ի սկզբանե ապօրինի վարչական ձերբակալման տակ բերման եմ ենթարկվել ոստիկանության Արաբկիրի բաժին, այս պահին դուրս եմ եկել ոստիկանությունից։

Շուրջ 3 ժամ ինձ չեն ծանուցել, թե ինչ կասկածանքի հիման վրա են բերման ենթարկել։ 3 ժամը լրանալուց հետո ցանկանում էի լքել ոստիկանության շենքը, ինձ ասեցին, որ այլ իրավական մեխանիզմով են ինձ բերման ենթարկել, ուստի պետք է պահեն 4 ժամ, այնուհետեւ տանեն Երեւանի քննչական վարչություն։

4 ժամը լրանալուց հետո, երբ նորից ցանկանում էի լքել ոստիկանության շենքը, ինձ պետք է փաստացի ձերբակալած լինեին որպես կասկածյալ, սակայն դա չէր արվել։

Ինչեւէ, ավելի քան 4 ժամ գտնվել եմ ոստիկանության բաժնում, հնարավորություն չեմ ունեցել օգտվելու իմ իրավունքներից եւ ազատություններից, այդ մասին իրազեկել եմ նաեւ ՄԻՊ աշխատակազմին․ բոլոր խախտումներն արձանագրվել են։

Իմ դեմ սկսված այս ապօրինությունները չեն կարող որեւէ կերպ կանխել իմ պայքարը Արցախը հանձնած այս տհաս եւ պիղծ իշխանությունների դեմ։

Իրավապահ բոլոր կառույցներին զգուշացնում եմ՝ չտրվել իշխանական ապօրինի հրամաններին եւ Նիկոլ Փաշինյանի հետ չկիսել երկիրը ողբերգության հասցրած իրավիճակի ողջ պատասխանատվությունը։

Չեք մարսելու»,- գրել է նա։

 

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ