Սահմանադրությունը պարզ փաստաթուղթ չէ, շատ զգույշ պետք է լինել․ Արթուր Ղամբարյան

«ՀՀ Սահմանադրություն․ կարմիր և կանաչ գծեր» խորագրով 2-րդ խորհրդաժողովի ժամանակ Սահմանադրական բարեփոխումների գործող հանձնաժողովի անդամ Արթուր Ղամբարյանը նշեց․ 

«Սահմանադրությունը պարզ փաստաթուղթ չէ, այն շատ խոր իրավական փաստաթուղթ է, որի տակ հսկայական տեքստ է թաքնված, և ոչ բոլոր իրավաբաններն են ունակ՝ վերծանելու ամեն բառի տակ թաքնված ինֆորմացիան։

Մեր սահմանադրական իրավունքը և Սահմանադրությունը ճիշտ ճանաչելու համար պետք է հասկանանք օբյեկտիվ իրավունքի գոյությունը: Այսօր այն ժամանակաշրջանն է, երբ Հայ Առաքելական եկեղեցին, որպես ազգային եկեղեցի, պետք է ճանաչվի որպես հանրային իրավունքի սուբյեկտ: Եկեղեցու և պետության փոխհարաբերությունները պետք է կառուցվեն ոչ թե միայն պետության միակողմանի օրենքով, ինչպես այսօր է գրված, այլ եվրոպական երկրների փորձով:

Այնտեղ պետություն-ազգային եկեղեցի հարաբերությունները կարգավորվում են սահմանադրական համաձայնագրերով: Եվրոպական երկրներում երկու կողմերը հավասարը հավասարի սկզբունքով նստում են և համապատասխան փաստաթուղթ ստորագրում», - ասաց բանախոսը:

Ղամբարյանը միաժամանակ շեշտեց՝ Սահմանադրության տեքստի հետ աշխատելիս շատ զգույշ պետք է լինել: