Դատարանը Դավիթ Գրիգորյանի իրավունքների խախտում արձանագրեց. News.am

News.am-ը գրում է․ «Երեւանի ընդհանուր իրավասության դատարանը` դատավոր Կարեն Ֆարխոյանի նախագահությամբ, այսօր՝ մայիսի 4-ին, բավարարել է դատավոր Դավիթ Գրիգորյանի աշխատասենյակը խուզարկելիս ՀՔԾ քննիչի կողմից թույլ տրված չարաշահումների դեպքի առթիվ քրեական գործի հարուցումը մերժելու որոշման դեմ պաշտպանի բողոքը։ Այս մասին NEWS.am-ին հայտնեց Դավիթ Գրիգորյանի փաստաբան Գեորգի Մելիքյանը։

Բողոքի հիմքերը իրավաչափ է ճանաչել։ Եվ դա պարտավորեցնում է Դատախազությանը ՀՔԾ քննիչի նկատմամբ հարուցել քրեական գործ։ Ըստ էության դատավոր Գրիգորյանի նկատմամբ կատարվել է հանցագործություն, դատարանն էլ իրավունքների խախտում արձանագրեց»։

Հիշեցնենք, որ հուլիսի 27–ին ԲԴԽ–ն բավարարել էր դատախազության միջնորդությունները եւ  համաձայնություն տվել Դավիթ Գրիգորյանի նկատմամբ քրեական հետապնդում հարուցելուն։ ԲԴԽ որոշմամբ՝ դատավորի լիազորությունները կասեցվել էին։

Ավելի ուշ Դավիթ Գրիգորյանին մեղադրանք առաջադրվեց  ՀՀ քրեական օրենսգրքի 314 հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։

Դավիթ Գրիգորյանը ՀՀ երկրորդ նախագահ Ռոբերտ Քոչարյանի գործով դատավորն էր եւ մայիսի 18–ին որոշում էր կայացրել Քոչարյանին ազատ արձակել՝ հիմք ընդունելով Արցախի ներկա եւ նախկին նախագահների անձնական երաշխավորությունը։