Մանվել Գրիգորյանը առողջական խնդիրների պատճառներով կրկին չի ներկայացել դատական նիստին

Ազգային ժողովի նախկին պատգամավոր, գեներալ Մանվել Գրիգորյանի և նրա կնոջ՝ Նազիկ Ամիրյանի գործով հուլիսի 23-ի նիստին Մանվել Գրիգորյանը չի ներկայացել: Նրան դատարան չեն բերել առողջական խնդիրների պատճառով:  «Նաիրի» ԲԿ-ից նիստի համար նույնաբովանադակ փաստաթուղթ էր ներկայացվել դատարանին, որտեղ նշված էր, որ մեղադրյալը դատական նիստին չի կարող մասնակցել՝ առողջական խնդիրների պատճառով:

Դատավոր Մնացական Մարտիրոսյանը նշեց, որ դատական նիստին ներկայացել է բժիշկ–փորձագետ, որը պետք է մասնակցի Գրիգորյանի համար նշանակված միջգերատեսչական հանձնաժողովային դատաբժշկական փորձաքննությանը: 

Հանրապետական ԲԿ-ի Էնդոկրինոլոգիայի բաժնի վարիչ Լուսինե Մամիկոնյանին հանձնվեց  համապատասխան փորձաքննության որոշումը՝ հնարավորություն տալով նրան ծանոթանալ, որից հետո եզրակացություն ներկայացնել: 

Մեղադրող կողմը դատարանից պահանջեց Լուսինե Մամիկոնյանի մասնագիտական գործունեությունը փաստող փաստաթղթեր, որը ներկայացնելու համար դատարանը ընդմիջում հայտարարեց:  Նիստը կշարունակվի 14.30-ին: