21  06  2019

Ռուբեն Սահակյանը հիշեց դատավոր Դանիելյանի նախկինում կատարած ապօրինությունները



 «Դատավոր Արմեն Դանիելյանի մասին մենք մեր կարծիքը հայտնել ենք ու ասել ենք, որ սա ոչ միայն մեր կարծիքն է, այլև ՀՀ փաստաբանների 90 տոկոսի կարծիքը։ Կարող է էն 10 տոկոսն ընդհանրապես չի առնչվել կամ միայն քաղաքացիական գործերով է վարվում։ Բայց մեզ միացավ նաև մեր դատավարական օպոնենտը՝ տուժողների իրավահաջորդների ներկայացուցիչը։

Դատավոր Դանիելյանը բարձր պրոֆեսիոնալ է իր մասնագիտության մեջ, այլ հարց են մարդկային հատկանիշները, կարողանո՞ւմ  ճիշտն օրենքի տառին համապատասխան կիրառել, թե՞ քիթը պահում է անընդհատ էն ուղղությամբ, ինչ ուղղությամբ մտածում է իշխանությունը՝ ժամանակին Ռոբերտ Քոչարյանի, հետո Սերժ Սարգսյանի, էսօր էլ էսօրվա։ Ամենամեծ ունակությունը դատավորների մեջ իր մոտ է գտնվում»- լրագրողների հետ հանդիպման ժամանակ ասաց ՀՀ երկրորդ նախագահ Ռոբերտ Քոչարյանի պաշտպան Ռուբեն Սահակյանը։

Պաշտպանը հիշեց, որ երբ փաստաբանների պալատի նախագահ էի, փաստաբանները դիմում էին վերաքննիչ դատարան և խնդրում գործը չմակագրել դատավոր Դանիելյանին. «Սա ինչի՞ մասին է վկայում, որ այս անձնավորությունը կատարում է հիմնականում պատվեր։ Կարող է պատվեր իջեցված չլինի դատավոր Դանիելյանին, և հիմնականում այդպես էր լինում, բայց բավական է նա իմանա, թե ինչպես է մտածում դատախազությունը, այդ մասին անմիջապես արձագանքում է: Երվանդ Վարոսյանը փաստաբաններից նկարագրել էր մի դեպք, որում երկու երիտասարդի առաջին ատյանի դատարանը չէր ձերբակալել։ Գործով անցնում էին նաև ոստիկաններ, որոնց հետ բախում էր եղել։ Դատախազությունը դիմել էր վերաքննիչ, և Արմեն Դանիելյանն այս անձանց կալանավորել էր։ Մի քանի ամիս անց պարզվել էր, որ իրականությունն այլ է, և տեղերը փոխվել էին։ Երկու երիտասարդներին բաց էին թողել, ոստիկաններին՝ կալանավորել։ Սա ինչի՞ մասին է խոսում, որ Դանիելյանն ապօրինի ակտ էր կայացրել։ Իրեն անհրաժեշտ էր ենթարկել քրեական պատասխանատվության ակնհայտ ապօրինի ակտի համար։ Ես դատավոր Դանիելյանից վրդովված եմ ինչի՞ համար․ իմ բարեկամներից մեկը եկավ և խնդրեց, որպեսզի ես դիմեմ Լուսինե Սահակյանին և Երվանդ Վարոսյանին, որպեսզի նրանք համոզեն այդ երկու դրիտասարդներին, որ իրենք իրենց ցուցմունքը փոխեն հօգուտ ոստիկանների։ Ես դա չարեցի և այդ օրվանից այդ բարեկամս ինձ հետ խռով է»,- ասաց Սահակյանը:

Մանրամասն՝ տեսանյութում

 



* Հարգելի ընթերցող, մեր տեքստերում վրիպակ գտնելու դեպքում, խնդրում ենք սեղմել «Ctrl+Enter» կոճակները, և բացվող պատուհանում նշել այդ մասին. այնուհետև հաստատել` սեղմելով «Ուղարկել» կոճակը

Դիտել նաև
Orphus համակարգ