177.390.000 եվրո. Հայաստանի պետական պարտքը կրկին ավելանում է

Ազգային ժողովի ասյօրվա՝ ապրիլի 5-ի հանձնաժողովի նիստում հավանություն կտրվի Հայաստանի Հանրապետության և Եվրոպական ներդրումային և Ասիական զարգացման բանկերի միջև կնքված երկու վարկային պայմանագրերի:

1. Հայաստանի Հանրապետության և Եվրոպական ներդրումային բանկի միջեւ «Երեւանի էներգաարդյունավետության երկրորդ փուլ» ֆինանսական պայմանագիր է ստորագրվել համաձայն որի՝ Հայաստանին կտրամադրվի 25.000.000 եվրո գումարի չափով վարկ:

Ծրագրի նպատակն է՝ նվազեցնել Երեւան համայնքի հասարակական շենքերի էներգիայի սպառումը եւ աջակցել էներգաարդյունավետության ու վերականգնվող էներգիայի միջոցառումներին, որոնք կներառեն անհրաժեշտ աշխատանքներ պոլիկլինիկաների եւ մանկապարտեզների ընդհանուր տեխնիկական վիճակի բարելավման համար: Մասնավորապես, Ծրագրի իրականացման արդյունքում հնարավոր կլինի նվազեցնել 38 հասարակական շենքերի (6 պոլիկլինիկա եւ 32 մանկապարտեզ) էներգիայի սպառումը:

Ծրագրի կանխատեսվող արդյունքներն են՝

1. էլեկտրաէներգիայի ծախսի նվազեցում,

2. սեյսմիկ անվտանգության բարելավում,

3. այցելուների հարմարավետության ու կյանքի որակի բարելավում,

4. ածխաթթու գազի (CO₂) արտանետումների կրճատում,

5. վերանորոգվող շենքերի շահագործման ժամկետի երկարաձգում:


2.Հայաստանի Հանրապետության և Ասիական զարգացման բանկի «Երեւանի քաղաքային զարգացման ներդրումային ծրագիր» վարկային համաձայնագրով Հայաստանին կտրամադրվի 60.090.000 եվրոյի չափով վարկ:

Համաձայնագրի շրջանակներում կառուցվելու է Իսակով-Արշակունյաց ճանապարհահատվածը, որը միմյանց կկապի Երեւան քաղաքի մի քանի վարչական շրջաններ՝ իր վրա վերցնելով տրանսպորտային մեծ հոսքեր եւ նվազեցնելով խցանումները: Իսակով-Արշակունյաց ճանապարհահատվածը հանդիսանում է Մոնթե Մելքոնյան փողոցի տրամաբանական շարունակությունը:

Նախատեսված աշխատանքները ներառում է.

1. Իսակով պողոտայի վրա առկա ճանապարհային հանգույցի անհրաժեշտ թեւերի կառուցում, որն ապահովվելու է մուտք դեպի Նորագյուղ թաղամաս,

2. Հրազդան գետի վրա կառուցվելու է 269 մ երկարությամբ երկաթբետոնե հեծաններով կամուրջ,

3. Արշակունյաց պողոտայում կառուցվելու է թունելային անցմամբ եւ շրջանաձեւ երթեւեկությամբ ճանապարհային հանգույց:

Երկու վարկերն էլ կտրամադրվեն Երևանի քաղաքապետարանին:

Հիշեցնենք. Մարտի 28-ի կառավարության նիստի չզեկուցվող հարցերի շարքում էլ ներառված էր ՀՀ պետական պարտքը 92.300.000 եվրոյով ավելացնելու հարցը:

Ստացվում է, որ Հայաստանի շուրջ 12 մլրդ դոլար պետական պարտքը նախատեսվում է ավելացնել ևս 177.390.000 եվրոյով: