Բեյրութում 3 հայ է զոհվել, վիրավորվել է «Ազդակ»-ի խմբագիրներից մեկը

Լիբանանյան լրատվամիջոցները հայտնել են Ջեսիկա Բեզջյանի մահվան մասին, որ Բեյրութի նավահանգստի պայթյունի ժամանակ եղել է Ռում հիվանդանոցի իր աշխատավայրում: 

«Արմենպրես»-ի հաղորդմամբ, «Արևելք» պարբերականը տեղեկացնում է, որ նա բուժքույր էր և, ըստ լրատվամիջոցների, մնացել է փլված առաստաղի տակ: Հիվանդանոցը գտնվում է Էշրեֆիեի շրջանում և շատ մոտ է Բեյրութի նավահանգստին, ուր օգոստոսի 4-ին որոտացել է հզոր պայթյուն:

Ջեսիկա Բեզջյանը Լիբանանի Մեսրոպյան հայկական վարժարանի շրջանավարտ էր, նա Լիբանանի Հիվանդապահների միության անդամ էր:

Ավելի վաղ տեղեկություն էր տարածվել պայթյունի հետևանքով լիբանանահայ գործիչ Նազար Նաճարյանի զոհվելու մասին: «Լիբանանի «Ազդակ» օրաթերթը հայտնում է, որ պայթյունի հետևանքով զոհերի թվում կա ևս մեկ հայ՝ Ժաք Պարամաքեանը:  

Բեյրութի նավահանգստում երեկ տեղի ունեցած մեծ պայթույունի հետևանքով մեծ նյութական վնաս է կրել «Շաղզոյեան» կենտրոնը, որտեղ տեղակայված են բազմաթիվ հայկական կառույցների գրասսենյակներ, հայտնում է Լիբանանում լույս տեսնող հայկական «Ազդակ» թերթը:

Կոտրված ու փշրված են գրասենյակների պատուհաններն ու դռները. մեծ վնասներ են կրել կրեցին ՀՅԴ Բյուրոյի, Միջին Արեւելքի Հայ դատի գրասենյակները, ՀՅԴ Լիբանանի կենտրոնական կոմիտեի գրասենյակը:  Մեծապես վնասվել է «Ազդակ»-ի «Փյունիկ» սրահը, խորհրդարանի հայ պատգամավորների գրասենյակը:

Նյութական վնաս են կրել «Ազդակ»-ի խմբագրությունը, «Վանայ Ձայն»-ի, Համազգայինի «Վահէ Սէթեան» տպարանը, Համազգայինի «Լլուսի Թութունջյան» ցուցասրահը, Համազգային Կենտրոնական վարչության եւ «Բագին»-ի գրասենեակները:

Բեյրութի նավահանգստում երեկ տեղի ունեցած մեծ պայթյունի հետևանքով վիրավորվել է Լիբանանում լույս տեսնող հայկական «Ազդակ» թերթի խմբագիրներից մեկը Նորա Բարսեղյանը: Այդ մասին հայտնում է «Ազդակ»-ը: