Պատմական փաստ է. Ռուբեն Մելիքյանը՝ ՄԻԵԴ Մեծ պալատի խորհրդատվական կարծիքի մասին

Ռուբեն Մելիքյանը ֆեյսբուքյան իր էջում գրում է.

Հենց նոր ավարտեցի ՄԻԵԴ Մեծ պալատի խորհրդատվական կարծիքը չորրորդ անգամ կարդալը։ Ամեն անգամ կարդալիս՝ նոր հետաքրքիր նրբերանգներ են ի հայտ գալիս։ Անչափ հետաքրքիր փաստաթուղթ է՝ իր կառուցվածքով, բովանդակությամբ, ձևակերպումներով, հղումներով, 16-րդ արձանագրության կիրառելիության չափանիշներով։

Ամեն դեպքում, պատմական փաստ է - Հայաստանի Հանրապետությունը դարձավ եվրոպական երկրորդ պետությունը, որի բարձր դատարանի դիմումի հիման վրա Եվրոպական դատարանը, 16-րդ Արձանագրության ներքո, ընդունեց Խորհրդատվական կարծիք՝ Կոնվենցիայի կոնկրետ դրույթների մեկնաբանման սկզբունքների վերաբերյալ։

Ի դեպ, համեմատելով առաջին խորհրդատվական կարծիքի հետ (դիմումը ստացվել էր Ֆրանսիայից)՝ կարող եմ փաստել, որ «հայկական» խորհրդատվական կարծիքը կարող է շատ ավելի լայն գործնական կիրառություն ստանալ Եվրոպայի Խորհրդի անդամ բոլոր 47 պետություններում առաջացող տարաբնույթ իրավական խնդիրների կապակցությամբ՝ քրեական իրավունքի ոլորտում։