Հիմա ավելի դուխով են կարմիր գծերը գծում. վարորդները դժգոհ են

Վարորդների իրավունքների պաշտպան, փաստաբան Արտակ Խաչատրյանը հոկտեմբերի 30-ին լրագրողների հետ զրույցում նշեց՝ նոր իշխանությունները պետք է վճարովի ավտոկայանատեղիների հարցով նոր ռազմավարություն մշակեն: 

«Կարմիր գծերի հետ կապված որևէ հստակեցում չկա, վարորդները դժգոհում են, որ նորից  կարմիր գծերը թարմացնում են. հիմա մի քիչ ավելի դուխով են կարմիր գծերը գծում»,-նշեց նա:

Խաչատրյանի խոսքով՝ կարմիր գծերի  հարցով հանրությունը երկու մասի է բաժանած. մի մասը կողմ է, որ կարմիր գծեր լինեն, մի մասը՝ ոչ: «Կարմիր գծերի սպասարկումը զրո է, պատասխանատվություն ու հստակություն չկա»,-ասաց նա՝ հավելելով, որ իրենց նպատակը ոչ թե կարմիր գծերը վերացնելն է, այլ վճարովի ավտոկայանատեղիները խելամիտ օգտագործելը:

Արտակ Խաչատրյանի խոսքով երթևեկելի գոտու վրա կարմիր գծեր գծելուն պետք է փոխարինեն այլընտրանքային ավտոկայանատեղիները: «Զարգացած երկրներում  բազմահարկ ավտոկայանատեղիներ կան, Երևանում էլ հնարավոր է այդ հարցը լուծել»,-ասաց նա:

Հիշեցնենք, որ Երևանի նորընտիր քաղաքապետ Հայկ Մարությանը շաբաթներ առաջ խոսելով կարմիր գծերի խնդրի մասին, ասել էր. «Կարմիր գծերի եւ այդ փարկինգների գումարները գնում են քաղաքային  բյուջե, եւ  ինչ-որ խնդիրներ են լուծվում դրանով»։

Արտակ Խաչատրյանը նաև նշեց՝ Երևանում ճանապարհային ոստիկանները գերծանրաբեռնված են աշխատում, քանի որ ավելացել են վթարների քանակը:«ՃՈ-ում չեն ավելացնում աշխատակիցների քանակը, մարդիկ ծանրաբեռնված աշխատում են, վթար են սպասարկում: Վթարների քանակով ռեկորդ ենք խփում, հասնում ենք Մոսկվային»,-նշեց նա՝ հավելելով, որ վթարների ավելացման պատճառը ոչ միայն Հայաստան բերվող ավտոմեքենաների քանակի աճն է, այլեւ երթեւեկությունը չկանոնակարգելը:

«Խնդիրն այն է, որ ՃՈ-ն չադապտացվեց, գլուխ չհանեց նոր իրավիճակում ինչ  ռազմավարություն վարի. մի մասը կողմ է խստացումներին, մյուսն՝ ազատականացմանը: ՃՈ-ն ոչ համարձակ է գործում, բայց վերջիվերջո վթարների ավելացման պատասխանատուն նա է»,-ասաց Խաչատրյանը:

Նրա խոսքով՝ ներկայումս  ապահովագրական ընկերություններոը հրաժարվում են Երեւանում վարորդների հետ պայմանագրեր կնքել, քանի որ վնասաբերությունը մեծ է: «Խնդիրը երթեւեկությունը կանոնակարգելն է, պետք է նորարարություններ մտցնեն, գիշերային ժամերին փոխեն լուսացույցների ռեժիմները եւ այլն»,-ասաց նա: