«Բաքու» ցուցանակը «Ռադիոլուրի» աշխատակիցները փոխարինել են «Ստեփանակերտ» ցուցանակով

Երեկ Հանրային ռադիոյի լրագրող, զոհված զինծառայողի մայր Ալիսա Գևորգյանը հրապարակել էր «Ռադիոլուր»-ի պատին հայտնված՝ Բաքվի և Անկարայի ժամերը ցույց տվող ժամացույցների լուսանկարները՝ գրելով. «Հանրային ռադիոյի «Ռադիոլուր» ծրագրում այսուհետ կկողմնորոշվենք նաև Բաքվի և Անկարայի ժամանակով: Արցախի հայաթափման տարելիցի առիթով, ինչ խոսք, հրաշալի նվեր էր…»։

Հանրային ռադիոյի նորանշանակ տնօրեն Արմեն Քոլոյանը Mediahub.am-ի հետ զրույցում նշեց, որ ժամացույցները չեն հեռացվելու։ «Իմ նախաձեռնությունն է, աշխարհի բոլոր նյուզռումերում կան բազմաթիվ ժամացույցներ, որոնք ցույց են տալիս տարբեր երկրների քաղաքների ժամանակը, երբ որ, օրինակ, հաղորդագրություն ենք ստանում, որ այսինչ քաղաքում ինչ-որ հանդիպում է տեղի ունենում, և գրվում է, որ տեղական ժամն է։ Ուստի, ավելի հեշտ կողմնորոշվելու համար մարդիկ նայում են ժամին և հասկանում են, որ եթե Երևանում ինչ-որ մի ժամ է, ապա այդ քաղաքում մեկ ուրիշ ժամ է։ Ընդամենը դա է»,- ասաց Քոլոյանը։

Այսօր Գևորգյանը լուսանկար է հրապարակել՝ կից գրելով․ ««Ռադիոլուր»-ի պատասխանը»։
«Բաքու» ցուցանակը «Ռադիոլուրի» աշխատակիցները փոխարինել են «Ստեփանակերտ» ցուցանակով։