Էդ ո՞ւմ խելքնա ցուրտը տարել. ինձ պետք չի փոխհատուցում, ինձ իմ հողնա պետք. 96-ամյա տավուշեցի

Կիրանցի 96-ամյա Լենա Ղարդաշյանը համագյուղացիների հետ փակել էր Հայաստան–Վրաստան միջպետական ճանապարհը:

Նա ասաց` որքան պետք լինի, կմնա ու կպայքարի իր հողի համար։

«Կարող ա`մինչև հաջորդ նիստը նստած լինեմ, կարող ա` հրաման տան, որ մեզ այստեղից տանեն ու գան, տանեն։ Ես իմ հողի համար եմ պայքարում։ Էնքան տարածք ենք տվել, որ ձանձրացել ենք, հերիք ա»,– նշեց տատիկը։

Հիշեցնենք, որ Հայաստանի և Ադրբեջանի սահմանին երեկ տեղի է ունեցել երկու երկրի միջև պետական սահմանի սահմանազատման հարցերով հանձնաժողովների ութերորդ հանդիպումը՝ Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի նախագահությամբ:

Հանդիպման արդյունքում ստորագրվել է արձանագրություն: Կողմերը պայմանավորվել են աշխատանքային կարգով համաձայնեցնել հաջորդ հանդիպման անցկացման ամսաթիվն ու վայրը: Մեր արտգործնախարարության հաղորդագրության համաձայն՝ հանդիպման արդյունքում նախնական համաձայնություն է ձեռք բերվել սահմանագծի Բաղանիս - Բաղանիս Այրում, Ոսկեպար - Աշաղը Ասկիպարա, Կիրանց - Խեյրումլի և Բերքաբեր - Կըզըլ Հաջիլի հատվածները համապատասխանեցնել Խորհրդային Միության փլուզման պահին գոյություն ունեցող իրավաբանորեն հիմնավորված միջհանրապետական սահմանին:

Հանդիպումից հետո բնակիչները փակել էին Հայաստան-Վրաստան միջպետական ճանապարհը։