Առողջապահական երկու կառույց կմիավորվի․ որոշման նախագիծ կա

 «Ռադիոիզոտոպների արտադրության կենտրոն» ՓԲԸ-ն կմիավորվի  «Վ.Ա. Ֆանարջյանի անվան ուռուցքաբանության ազգային կենտրոն»-ին ․ այս մասին կառավարությունը որոշման նախագիծ է մշակել։ Հիմնավորվում է, որ  ուռուցքաբանական ծառայության բարելավման և շարունակական զարգացման, ինչպես նաև միջուկային բժշկության զարգացման նպատակով է  առաջացել երկու կառույցները միավորելու անհրաժեշտությունը։

Նաև նշվում է, որ որ չարորակ նորագոյացությունների դեմ պայքարի գործընթացում հաջողության անկյունաքարն է վաղ ախտորոշումը: Ուռուցքաբանական համալիր ծառայությունների մատուցման տեսանկյունից անհրաժեշտ է, որ ուռուցքաբանության կենտրոնն ունենա նաև ուռուցքաբանության մեջ այսօր անփոխարինելի համարվող ՊԷՏ/ՀՏ, որը թույլ է տալիս հայտնաբերել ուռուցքային օջախները, տալ դրանց քանակական և որակական գնահատականը: ՊԷՏ/ՀՏ-ի դերը մեծ է նաև բարորակ և չարորակ նորագոյացությունների տարանջատման, նորագոյացության տարածվածության գնահատման և բուժումից հետո հիվանդության կրկնության վաղ հայտնաբերման գործընթացում: