Հավանականությունը մեծ է, որ Ռոբերտ Քոչարյանի գլխավորած դաշինքը իշխանության կգա․ Գագիկ Համբարյան․ News.am

Մենք չենք կորցրել եռատոնը, մեզնից գողացել են այն եւ գողացել են ոչ թե թուրքերը, մեր թշնամիները, այլ Նիկոլ Փաշինյանը։ Այս մասին մայիսի 9–ին, Ազատության հրապարակում, NEWS.am-ի հետ զրույցում ասաց քաղաքագետ Գագիկ Համբարյանը, որը Ազատության հրապարակում մասնակցում էր  ՀՀ երկրորդ նախագահ Ռոբերտ Քոչարյանի, ՀՅԴ եւ «Վերածնվող Հայաստան» կուսակցությունների համատեղ հանրահավաքին։

«Եռատոնի պղծման գործընթացը սկսվեց սեպտեմբերի 27-ին եւ ավարտվեց նոյեմբերի 9-ին ու  պատահական չէր ամսի 9-ին Շուշին հանձնելը։ Դավաճան վարչապետն ամեն ին անում է մեզ վնասելու, նսեմացնելու համար։ Այսօրվա «տոնը» ինձ համր տոն չէ։ Ես որպես քաղաքացի իմ կյանքից կորցրել եմ մի կարեւորագույն դրվագ, որը համարել եմ մեծ ձեռքբերում՝ Շուշիի ազատագրումը»,- ասաց քաղաքագետը՝ հավելելով, որ մինչեւ հիմա պարզ չէ  Շուշիի հանձնման պատասխանատուն։

«Քանի որ գործող վարչակարգը թաքուն է պահում բոլոր մեղավորներին ու այդ պատճառով մենք տանուլ ենք տվել պատերազմը, ես իրավունք ունեմ ենթադրելու, որ այդ ամենի հեղինակը Նիկոլ Փաշինյանն էր, ով նոյեմբերի 9-ին Շուշին նվիրեց թուրքին, տվեց այն օրը, երբ Ադրբեջանը տոնում էր իր պետական դրոշի օրը, սրանք պատահականություններ չէին»,- ասաց Գագիկ Համբարյանը։

Անդրադառնալով հանրահավաքի իր մասնակցությանը, Գագիկ Համբարյանն ասաց, որ առաջին անգամն է, որ ընդդիմության հանրահավաքներին մասնակցում է, եւ նախընտրել է հենց այս մեկին մասնակցել։

 «Հավանականությունը մեծ է, որ Ռոբերտ Քոչարյանի գլխավորած «Հայաստան» դաշինքը իշխանության կգա։ Ռոբերտ Քոչարյանի ղեկավարած դաշինքն ամենամեծն է ու շատ ձայներ ակնկալողը։ Հույս ունեմ, որ մեր հասարակությունը մինչեւ ընտրությունը կկողմնորոշվի ու կհասկանա, թե ինչ աղետի հետ գործ ունի եւ իր ձայնը կտա արժանիին»,- նշեց քաղաքագետը։ 

Նա հույս հայտնեց, որ ընտրությունների արդյունքում կձեւավորվի ընդդիմության դաշինք, որը կստանձնի Հայաստանի ղեկավարությունը։