Նիկոլ Փաշինյանը քիթը խոթում է բոլորի խնայողությունների մեջ. Վահան Իշխանյան

Հրապարակախոս Վահան Իշխանյանը ֆեյսբուքյան իր էջում անդրադարձել է քաղաքացիների խնայողությունների մասին Ազգային ժողովում վարչապետ Նիկոլ Փաշինյանի արած հայտարարությանը:

«Հայաստանում մեկ մարդ կա, որ հետևում է բոլորին, քիթը խոթում մարդկանց խնայողությունների մեջ և այդ մեկ մարդը վարչապետն է։

Փաշինյանը ԱԺ ում ակամա խոստովանեց, որ քիթը խոթել է բոլորի բանկերի հաշիվներ և չափում է թե յուրաքանչյուր քաղաքացի ինչքան խնայողություն ունի «մենք դեպքեր ունենք գոնե հիսուն դեպք ունենք, երբ մարդը բանկում ունի 20 միլիոն և ավել ավանդ, եկել պետությանը հայտրարագիր է տվել, որ ինքը 26 հազար դրամի կարիք ունի, իհարկե, ծրագրից օգտված 146 հազար մարդու մեջ տոկոս չի կազմում։ 9֊րդ միջոցառումից օգտված 70 մարդ կա որոնք իրար հետ մի միլիարդ դրամ ավանդ ունեն բանկերում» (20 միլիոն դրամը կանի մոտ 42 500 դոլար, իսկ մեկ միլիարդ դրամը եթե հավասար բաժանես 70 հոգու մեջ կանի յուրաքանչյուրին 30 հազար դոլար, հնարավոր է մեկը հազար դոլար ունենա, մյուսը 80 հազար, ո՞վ գիտի, Փաշինյանը այսպես միջինացում է որ ասի՝ տեսեք էսքան հարուստ կա, բայց պետությունից փող են ուզում, ու խուսափի մարդկանց կորուստները փոխհատուցելուց)։

Մեկը փող է հավաքել, որ առողջական խնդիրների դեպքում օգտագործի, մյուսը՝ երեխաների ուսման համար, էն մեկը, որ բնակարան առնի, էն մյուսը ուղղակի հետ է գցել, ո՞ւմ գործն է իմանալ, թե ինչու է մարդ փող է հավաքել կամ ինչքան է հավաքել, իր գաղտնիքն է, նույնիսկ մարդիկ կան, որ ամուսնուց են թաքցնում խնայողությունները, վարչապետը ո՞վ դառավ, որ քիթը խոթում է նրանց հոգապահուստների մեջ։

Կորոնավիրուսի համաճարակի դեմ պայքարում պետությունները արտակարգ դրություն մտցնելով իրենց վրա են վերցնում քաղաքացիների կորուստները։ Օրինակ՝ Կանադայում աշխատանք կորցրած բոլոր անձանց բաժանում են ամսկանա 2000 դոլար, մտքներով էլ չի անցնում քիթը խոթեն բանկային հաշիվների մեջ տեսնեն յուրաքանչյուրը ինչքան խնայողություն է հետ գցել: Կանադան հարո՞ւստ է, աղքատ երկրներն էլ մեծ պարտքեր են անում, որ փոխհատուցեն իրենց քաղաքացիներին, օրինակ՝ Վրաստանը դեռ մեկ ամիս առաջ մեկ ու կես միլիարդ դոլար էր բերել, և ոչ թե կապեյիչնիկություն են անում, լրտեսում իրենց քաղաքացիների խնայխողությունները ու «բռնացնում»՝ դու փող ունես հավաքած հանի վարձերդ մուծի, իմ պես առողջ տղամարդ ես, քո տեղը հո չե՞մ մուծելու։ Վարչապետի համոզմունքն է, թե բյուջեն հոր տնից է բերել, իսկ ինքը որևէ պարտավորություն չունի քաղաքացիների հանդեպ»,- գրել է Վահան Իշխանյանը։