Հասկանում ենք՝ սա իդեալական տարբերակ չէ․ իմքայլականը՝ նոր նախագծի մասին

ԱԺ «Իմ քայլը» խմբակցության Վարազդատ Կարապետյանը «Տեղական հանրաքվեի մասին» օրենքում լրացումներ և փոփոխություններ կատարելու մասին և «Տեղական ինքնակառավարման մասին» օրենքում լրացումներ կատարելու մասին հարցերը երկրորդ ընթերցմամբ և ամբողջությամբ ընդունելու հարցերով արտահերթ նիստին նշեց, որ նախագծի տրամաբանությունն այն է, որ Կառավարությունը շրջանառում է վարչատարածքային բաժանման մասին նախագիծ, համայնքներում նախաձեռնող խմբերը հնարավորություն ունենան նախաձեռնել տեղական հանրաքվեներ՝ արդյունքները բերելով ԱԺ:

«Պետաիրավական հարցերի հանձնաժողովը հավանության է արժանացրել նախագիծը: Մենք հասկանում ենք, որ սա իդեալական տարբերակ չէ. ընդհանարապես տեղական հանրաքվեի ինստիտուտը Հայաստանում կայացած չէ, դրա համար մենք պետք է երկար աշխատենք համայնքներում ուղիղ ժողովրդավարության գործիքակազմը արդյունավետ ներդնելու ուղղությամբ»,- ասաց նա:

Վարազդատ Կարապետյանը տեղեկացրեց, որ առաջինից երկրորդ ընթերցում երկու փոփոխություն են առաջարկել: «Առաջինով բարդացնում ենք տեղական հանրաքվեի մեխանիզմը՝ սահմանելով 50 տոկոսանոց մասնակցության շեմ»,- ասաց նա:

Երկրորդ փոփոխությունն այն է, որ համայնքների ղեկավարներին հնարավորություն տան տեղերում անցկացնել բաց քննարկումներ և լսումներ և այդ արդյունքները նույնպես կցել վարչատարածքային բաժանման մասին օրենքի նախագծին Ազգային ժողով բերելուց առաջ: