Ընտրապայքարը 12 օր հետո ավարտվելու է, մենք մնալու ենք մեր հակառակորդի հետ երես առ երես. Վիգեն Սարգսյան

«Ես չեմ ուզում Սասուն Միքայելյանի ասածը մեկնաբանել, շատ ուզում եմ հավատալ, որ դա լեզվի սայթաքում է եղել: Եթե դա մտածված հայտարարություն է եղել, որ այս հաղթանակը ավելի կարևոր է քան Արցախյան հաղթանակը, եթե Փաշինյանի հետ քննարկված հայտարարություն է, ապա դա շատ խորը գնացող հետևանքներ ունի»,- «Հայելու առաջ» հաղորդաշարի ժամանակ նշել է ՀՀ Պաշտպանության նախկին նախարար, ՀՀԿ ցուցակը գլխավորող Վիգեն Սարգսյանը:

Վիգեն Սարգսյանն ասել է, որ մեկ այլ հեռու գնացող և խորը խնդիր կա. «Եթե մենք խոսում ենք ավելի խորը, ինձ համար շատ ավելի խորը խնդիր է այն ճգնաժամը, որն այսօր վարչապետը ստեղծում է Արցախի ռազմաքաղաքական ղեկավարության հետ շփումների մեջ հանրային հայտարարություններ անելով, որոնք հեռու գնացող շատ վտանգավոր հետևանքներ ունեն»։

Նա նաև կոչով դիմեց վարչապետի պաշտոնակատարին և Արցախի բանակի ղեկավար կազմին. «Ես ուզում եմ ուղղակի օգտագործելով առիթը բոլորին, բոլորին կոչ անել, և վարչապետի պաշտոնակատարին և Արցախի մեր եղբայրներին և բանակի ղեկավար կազմին մի պահ հետ կանգնել, և մոռանալ, որ հիմա ընտրապայքար է ընթանում: Ընտրապայքարը 12 օր հետո ավարտվելու է, մենք մնալու ենք մեկա մեր հակառակորդի հետ երես առ երես, 100 հազարավոր բանակի հետ, որը շատ ուժեղ սպառազինված է, և որին պետք է պատրաստ լինել արձագանքել: Մեր ներքին որդը մեզ ուտելու է»,- նշել է Պաշտանության նախկին նախարարը։