Չխաբվեք մեր սև-սպիտակ պաստառներին. Աշոտյան

Չխաբնվեք մեր սև-սպիտակ պաստառներին, մեր սև-սպիտակ քարոզչական փաթեթավորմանը, իրականում մեր քարոզարշավը լինելու է շատ գունեղ: Այս մասին ֆեյսբուքյան իր էջում ուղիղ եթերում հայտարարել է ՀՀԿ փոխնախագահ Արմեն Աշոտյանը։

«Մեր քարոզարշավը լինելու է շատ տպավորիչ, շատ պայծառ, շատ ջերմացնող: Սև-սպիտակը մեզ պարտադրվել է նոր իշխանությունների կողմից որպես Հայաստանում նոր իրողություն: Մենք ընդունել ենք այդ հրավերը և այդ թելադրանքի մեջ ուզում ենք թելադրել մեր սեփական օրակարգը: Ակնկալեք մեզնից շատ անկեղծ ու բանական ելույթեր, իրական քաղաքական պայքար, իրական քաղաքական մշակույթ»,-ասաց Աշոտյանը:

Նա հաջողություն մաղթեց բոլոր քաղաքական ուժերին ու թեկնածուներին. «Որ գալիք ԱԺ-ն լինի ոչ թե հասարակության ծուռ հայելի, այլ հասարակական մտահոգությունների, ահազանգերի, նյարդերի կծիկի արտահայտողը: Ուզում եմ հավատալ, որ ընտրարշավը կանցնի ոչ միայն գրված, այլեւ չգրված օրենքների շրջանակներում: Կոչ եմ անում իմ գործընկերներին զերծ մնալ էժանագին բաներից, էժան բաներ չանենք այս ընտրարշավի ընթացքում: Էժան քաղաքական գործիչները հետագայում թանկ են նստում երկրի վրա»,-ասաց Աշոտյանը:

«ՀՀԿ-ում պահպանվել է կորիզը, այն կուռ թիմ է, մրցունակ կազմ ունենք: Դուք յուրաքանչյուր ընտրական տարածքում կարող եք գտնել ձեր սրտի ՀՀԿ-ական թեկնածուի:

Ընտրապայքարը թեժ է լինելու, ես չեմ բացառում, որ իմ մրցակիցները կարող են դիմել նաեւ արգելված մեթոդների, անազնիվ քայլերի, զրպարտանք տարածելով իմ անձի հանդեպ: Այդպիսի դեպքեր եղել են: Եթե ընտրարշավի ընթացքում որեւէ սկանդալային լուր հաղորդեցին իմ անձի հետ կապված, ես հասանելի եմ բենզալցակայանի ռեժիմով՝ 7/24 ռեժիմով, այսինքն 7 օր 24 ժամ ռեժիմով»,-ընդգծեց Աշոտյանը: