Ներդրումները դեռ հեռախոսազանգերի ու խոստումների մակարդակում են. Արմենուհի Կյուրեղյանը՝ Նիկոլ Փաշինյանին

2019 թվականի բյուջեում որքա՞ն միջոցներ են հատկացվել ՏՏ ոլորտին, գյուղատնտեսությանը և զբոսաշրջությանը: Այս մասին նոյեմբերի 13-ին, ԱԺ-ում 2019 թվականի բյուջեի նախագծի քննարկման ժամանակ Նիկոլ Փաշինյանին հարց ուղղեց ՀՅԴ խմբակցության պատգամավոր Արմենուհի Կյուրեղյանը:

«Այս նախագծում որևէ կերպ չի նկատվում այդ կարևորումը: Ինչ միջոցներ են նախատեսվել բյուջեում այս ոլորտների զարգացման համար, թե՞ հույսներս պետք է դնենք միայն ենթադրյալ ներդրումների վրա»,-ասաց նա:

ՀՅԴ պատգամավորը հիշեցրեց վարչապետի ելույթը մայիսի 8-ին, որտեղ նա ասել էր, թե դրսից ստանում է տասնյակ հազարավոր զանգեր, որ մարդիկ պատրաստ են ներդրումներ անել Հայաստանում, եթե ինքն ընտրվի վարչապետ. «Դուք ընտրվեցիք վարչապետ, բայց ներդրումները դեռ հեռախոսազանգերի ու խոստումների մակարդակում են: Հիմա խոստումների հիման վրա՞ եք ուզում զարգացնել ՏՏ ոլորտը, գյուղատնտեսությունն ու զբոսաշրջությունը»,-ասաց նա:

Ի պատասխան Նիկոլ Փաշինյանը պատասխանեց. «Եթե աշխատող մարդը պլանավորում է 5 օրով մեկնել Հայաստան, դա իրենից պահանջում է մի քանի ամիս: Հիմա ներդրումները ճամպրուկների մեջ կամ անկողնու տակ դրած փո՞ղ է, որ հենց զանգեց, ասեց շատ լավ, ինձ էլ ընտրեցիք վարչապետ, ճամպրուկը վերցրեց ու եկավ Հայաստան: Ձեր կուսակցությունը ներկայացնող տնտեսական զարգացումների ու ներդրումների նախարար Արծվիկ Մինասյանը հայտարարել է, որ ներդրումային հազարավոր ծրագրեր ներկայացվել ներդրողների կողմից և դրանք քննարկման ընթացքում է»:

Փաշինյանը նշեց, որ օրինակ, ՏՏ ոլորտում 13 տոկոս եկամտահարկի նվազեցում են նախատեսում: