ԱԱԾ և ՀՔԾ ղեկավարների գաղտնալսված հեռախոսազրույցի դեպքով ԱԺ-ն քննիչ հանձնաժողով է ստեղծում

Սահմանադրության 108-րդ և Ազգային ժողովի կանոնակարգ օրենքի 20-րդ հոդվածի համաձայն, ԱԺ պատգամավորների 1/4-ը դիմել է ԱԺ նախագահ Արա Բաբլոյանին՝ արդարադատության կայացմանը խոչընդոտելու արդար դատաքննության իրավունքի և հեռախոսային խոսակցությունների գաղտնիությունը խախտելու փաստերի մասին հարցի ուսումնասիրության նպատակով Քննիչ հանձնաժողով ստեղծելու պահանջով։ Այս մասին ԱԺ նիստում հայտարարեց ԱԺ նախագահ Արա Բաբլոյանը։

ԱԺ նախագահը տեղեկացրեց, որ սեպտեմբերի 13-ի կեսօրին ԱԺ նիստի անմիջապես ավարտից հետո պատգամավորների նախաձեռնությամբ հրավիրվում է Ազգային ժողովի արտահերթ նիստ, որտեղ էլ որոշում է կայացվելու հանձնաժողովը ստեղծելու մասին։

Նշենք, որ ՀՀ օրենսդրության համաձայն՝ ԱԺ Քննիչ հանձնաժողովն ստեղծվում է  իրավունքի ուժով, իսկ հանձնաժողովի անդամների թիվը սահմանվում է ԱԺ որոշմամբ։