Ադրբեջանը ընդլայնում է գազի մատակարարումը Եվրոպա․ Հասել են Սլովենիա

Ադրբեջանի պետական ​​նավթային ընկերությունը (SOCAR) օգոստոսի 1-ից սկսել է գազի մատակարարումները Սլովենիա:

«2024 թվականի օգոստոսի 1-ից SOCAR-ն սկսել է գազի մատակարարումները Սլովենիա: Մատակարարումներն իրականացվում են փոխըմբռնման հուշագրին համապատասխան, որն այս տարվա հուլիսի 17-ին SOCAR-ի և Սլովենիայի բնական գազի շուկայի խոշորագույն ընկերության՝ Geoplin-ի միջև ստորագրվել է գազամատակարարման բնագավառում համագործակցության ընդլայնման նպատակով», – հայտնել է SOCAR-ի մամուլի ծառայությունը։

Լուրը մեկնաբանել է Սլովենիայի շրջակա միջավայրի, կլիմայի և էներգետիկայի նախարար Բոյան Կումերը:

«Հավատում եմ, որ այս և հետագա գործարքները կհանգեցնեն երկարաժամկետ հաջող համագործակցության ոչ միայն երկու ընկերությունների, այլև երկու երկրների միջև»,- նշել է նախարարը՝ ընդգծելով, որ Ադրբեջանը, որպես կարևոր ռազմավարական մատակարար ԵՄ-ի համար, լրացուցիչ հնարավորություն է Սլովենիային գազի մատակարարումների դիվերսիֆիկացման համար:

Կումերը նաև նշել է, որ 2024 թվականի հուլիսի 17-ին Բաքու կատարած այցի ընթացքում Ադրբեջանի էներգետիկայի նախարար Պարվիզ Շահբազովի հետ պայմանավորվածություն է ձեռք բերվել ջանքեր գործադրել՝ երկու երկրների ընկերությունների համագործակցության հնարավորություններ բացելու համար նաև այլ ոլորտներում։

Հստակեցվում է, որ Թուրքիայից, Վրաստանից, Իտալիայից, Հունաստանից, Բուլղարիայից, Ռումինիայից, Հունգարիայից և Սերբիայից հետո Սլովենիան դարձել է 9-րդ երկիրը, որին ադրբեջանական գազ է մատակարարվում։