Ռոբերտ Քոչարյանի գործն ընթանում է մարդու իրավունքների ոտնահարումով. Լարիսա Ալավերդյան

Մարդու իրավունքների առաջին պաշտպան, իրավապաշտպան Լարիսա Ալավերդյանն օգոստոսի 9-ին կայացած ասուլիսին հայտարարեց, որ երկրորդ նախագահ Ռոբերտ Քոչարյանի գործն ընթանում է մարդու իրավունքների ոտնահարումով։

Նրա խոսքով՝ որոշ մարմիններ ժամ առաջ ուզում են ապացուցել հավատարմությունը նոր իշխանություններին. «Այստեղ դիտարկում ենք խիստ հակառակ գործընթացներ։ Ես չեմ խոսում ՀՔԾ  նախագահի հայտարարությունից. մենք նման բան չենք ունեցել վերջին 25 տարվա ընթացքում։ Այսինքն՝ հրապարակավ ասել, որ սա է ճիշտը, դա ոչ թե ճնշում է, այլ այն նույն պրակտիկան է, որի դեմ ուզում է պայքարել նոր իշխանությունը»։

Լարիսա Ալավերդյանն ամբողջովին համաձայն է Ռոբերտ Քոչարյանի պաշտպանների բերած փաստարկների հետ. «Երբ Ռուբեն Սահակյանը գրել է, որ երբևիցե չի հանդիպել նման կոպիտ խախտումներ, դուք երիտասարդ եք և չգիտեք, թե դա ինչ է նշանակում։ Ռուբեն Սահակյանը պաշտպան է եղել սումգայիթյան տուժածների գործով, և երբ ես ընթերցեցի դա, ավելի շատ տպավորվեցի, որովհետև հասկանում եմ, որ իր պրակտիկան ներառում է ոչ միայն հայաստանյան, այլև սովետական ժամանակաշրջանում այդ ծանրագույն գործը, որտեղ նա և Ռուբեն Ռշտունին փայլուն ձևով են հանդես եկել»։

Նրա խոսքով՝ Հայկ Ալումյանի ձևակերպումներն էլ ամբողջական են. «Ունենալով իր անբիծ պատմությունը՝ թույլ է տվել իրեն բավականին պարզ արտահայտվել այդ հարցում։ Իր ասածի մեջ կա մի բան, որին բոլոր լրագրողները պետք է նշանակություն տան. նա ասում է, որ հետամնացություն է, երբ դատապաշտպանին նույնացնում են մեղադրյալի հետ։ Այդ ձևերը օր առաջ պետք է հաղթահարվեն, գործն ընթանա անբիծ ձևով, որը կբարձրացնի իշխանությունների պատիվը, մեր իրավիճակը կփոխի։ Այսպիսի գործառույթներով իրավիճակը չի փոխվելու»։

Ըստ Ալավերդյանի՝ Փաստաբանների հանդեպ այդ ամոթալի արշավը, որ սկսվել է, և՛ երկրի պատիվն է գցում, և՛ հասարակության. այն անձինք, ովքեր դա անում են, ուղղակի իրենց ապագայի վրա խաչ են քաշում: