Ֆուտբոլը բանակից կարևոր է․ ֆուտբոլիստները բանակ չեն գնա

Կառավարությունն իր այսօրվա՝ հունվարի 13-ի նիստում որոշում կայացրեց Ռոբերտ Դարբինյանին, Դավիդ Դավիդյանին, Արտյոմ Ավանեսյանին և Ջորդի Ջոաո Մոնրոյ Արարատին զինծառայությունից ազատելու մասին։

Նրանք հանդես են գալիս ֆուտբոլի Հայաստանի Հանրապետության ազգային հավաքական թիմում:

Կառավարության հիմնավորման մեջ ասվում է․ «Մի շարք քաղաքացիների շարքային կազմի պարտադիր զինվորական ծառայությունից ազատելու մասին»» Հայաստանի Հանրապետության կառավարության որոշման նախագծի (այսուհետ՝ Նախագիծ)  ընդունումը պայմանավորված է այն հանգամանքով, որ, Ռոբերտ Մելիքի Դարբինյանին Հայաստանի Հանրապետության կառավարության 2019 թվականի հունվարի 31-ի № 47-Ա որոշմամբ, Ջորդի Ջոաո Մոնրոյ Արարատին Հայաստանի Հանրապետության կառավարության 2020 թվականի փետրվարի 6-ի № 122-Ա որոշմամբ  տարկետում է  տրվել մինչև 2021 թվականի ձմեռային   զորակոչը:  Քանի որ  Ռոբերտ Մելիքի Դարբինյանի,  Ջորդի Ջոաո Մոնրոյ Արարատի 26 տարին լրանում է 2021 թվականին, ապա  հնարավոր չէ նրանց շարքային կազմի պարտադիր զինվորական ծառայության զորակոչից տարկետում տալ։

Ռոբերտ Մելիքի Դարբինյանին և Դավիդ Ռուդիկի Դավիդյանին տրվում է պարտադիր զինվորական ծառայությունից ազատում՝ համաձայն «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքի 21‑րդ հոդվածի 5-րդ մասի և Հայաստանի Հանրապետության կառավարության 2019 թվականի փետրվարի 15-ի «Քաղաքացուն բացառիկ դեպքերում պարտադիր զինվորական ծառայությունից ազատելու կարգը սահմանելու մասին» № 89-Ն որոշման հավելվածի 2-րդ կետի 2-րդ ենթակետի։ 

Հետևաբար անհրաժեշտություն է առաջացել Ռոբերտ Մելիքի Դարբինյանին, Դավիդ Ռուդիկի Դավիդյանին, Արտյոմ Արեգի Ավանեսյանին և Ջորդի Ջոաո Մոնրոյ Արարատին  ազատել  շարքային կազմի պարտադիր զինվորական ծառայությունից: Ռոբերտ Մելիքի Դարբինյանը, Դավիդ Ռուդիկի Դավիդյանը, Արտյոմ Արեգի Ավանեսյանը և Ջորդի Ջոաո Մոնրոյ Արարատը  հանդես են գալիս ֆուտբոլի Հայաստանի Հանրապետության ազգային հավաքական թիմում:

 Դավիդ Ռուդիկի Դավիդյանը 2021 թվականի  մայիսի 31-ի  N  114-Ա  հրամանագրով Հայաստանի Հանրապետության  քաղաքացիություն է   շնորհվել,  սակայն վնասվածքի պատճառով չի կարողացել ներկայանալ Հայաստանի ազգային հավաքականի ամառային հանդիպումներին, ուստի վերջինս Հայաստան է ժամանել 2021 թվականի  օգոստոսի 16-ին և օգոստոսի 17-ին հաշվառվել է Կենտրոնի ԶԿ-ում, իսկ օգոստոսի 24-ին անձնագրավորվել է Հայաստանի Հանրապետության  քաղաքացու անձնագրով։

Ռոբերտ Մելիքի Դարբինյանը, Դավիդ Ռուդիկի Դավիդյանը, Արտյոմ Արեգի Ավանեսյանը և Ջորդի Ջոաո Մոնրոյ Արարատը  հաշվառված են Երևանի Կենտրոնի տարածքային զինվորական կոմիսարիատում: