Բուն Հայաստանի համար ավելի շատ մինուսներ կան․ Պետդումայի ներկայացուցիչը՝ Мир քարտերի մասին

Мир քարտերով գործունեությունը դադարեցնելու հայկական բանկերի որոշումը կորուստ կլինի հենց Հայաստանի և նրա ռեզիդենտների համար։ Այս կարծիքը ТАСС-ին հայտնել է Պետդումայի ֆինանսական շուկայի կոմիտեի ղեկավար Անատոլի Ակսակովը։

Ավելի վաղ РБК-ն հայտնել էր, որ մարտի 30-ից ռուսական Мир վճարային համակարգի քարտերը կդադարեցնեն աշխատել Հայաստանի բանկերի մեծ մասի բանկոմատներում և POS տերմինալներում։

«Այս ամենը տեղի է ունենում ակնհայտորեն ամերիկացիների ճնշման ներքո: Իհարկե, սա կորուստ է Հայաստանի համար։ Որովհետև Հայաստանի շատ բնակիչներ և ՌԴ քաղաքացիներ, ովքեր հաճախ են այցելում այնտեղ, այդ թվում՝ հայեր, օգտվում են Мир քարտից։ Փաստորեն, բուն Հայաստանի համար ավելի շատ մինուսներ կան, Ռուսաստանի համար՝ լավ, չեն ընդունի ու հաշվարկներ անեն։ Նրանք իրենց համար խնդիրներ են ստեղծում։ Վստահ եմ, որ լուծում կգտնվի»,- ասաց նա։

Ակսակովը նշել է, որ Ռուսաստանի համար հնարավոր է օգտագործել թվային ֆինանսական ակտիվներ։ «Մենք օրենք ենք ընդունել միջազգային վճարումների համար թվային ֆինանսական ակտիվների օգտագործման հնարավորության մասին։ Եվ հիմա այս գործընթացը աստիճանաբար կզարգանա»,- նշեց պատգամավորը։

Միևնույն ժամանակ, Ակսակովը կարծում է, որ հայկական բանկերի նման որոշումը «լավ ազդանշան է նույն թվային ռուբլու օգտագործման հնարավորինս արագ անցման համար, օրինակ՝ Հայաստանի տարածքում փոխադարձ հաշվարկներում»։

Բացի այդ, Չինաստանը, Հնդկաստանը, Մոնղոլիան և բոլոր հետխորհրդային երկրները, որոնք ԱՊՀ-ի մաս են կազմում, բացառությամբ Ուկրաինայի, ընդունում են ռուբլին, և վճարումները նորմալ են ընթանում, հավելել է Ակսակովը։