Պեկինում Ռուսաստանի նախագահ Վլադիմիր Պուտինի հետ բանակցությունների ընթացքում Չինաստանի առաջնորդը նշել է, որ Մերձավոր Արևելքում ռազմական գործողությունները պետք է դադարեցվեն՝ ընդգծելով խաղաղության հասնելու համար բանակցությունների առանձնահատուկ կարևորությունը։ Գրում է BBCnews-ը:
Սի Ցզինպինի խոսքով՝ պատերազմի դադարեցումը կօգնի նվազեցնել համաշխարհային էներգակիրների մատակարարումների և միջազգային առևտրի կայունության սպառնալիքները։
Անցած շաբաթ չինացի առաջնորդը Պեկինում ընդունել էր ԱՄՆ նախագահ Դոնալդ Թրամփին։ ԱՄՆ-ն հակամարտությունը Իրանի հետ սկսել էր փետրվարի 28-ին՝ պահանջելով, որ Թեհրանը հրաժարվի իր միջուկային ծրագրից։
Իրանին Վաշինգտոնի պայմաններին համաձայնեցնելու փորձերը արդյունք չեն տվել, մինչդեռ Հորմուզի նեղուցի շրջափակումը, որը կարևոր ուղի է Պարսից ծոցից նավթի և հեղուկացված բնական գազի արտահանման համար, աշխարհում լուրջ էներգետիկ ճգնաժամ է առաջացրել, որի ազդեցությունը զգացել է նաև Չինաստանը։
Այս ֆոնին ռուսական նավթի և գազի նկատմամբ ԱՄՆ պատժամիջոցները մասամբ մեղմացվել են։ Ռուսական գազի մատակարարումների ավելացումը դեպի Չինաստան պետք է դառնա Վլադիմիր Պուտինի՝ Պեկին այցի կարևորագույն թեմաներից մեկը։
