Ադրբեջանցի պաշտոնյան խոստովանում է, որ փակել են Լաչինի միջանցքը իրենց պայմանները Արցախում ապրող հայերին պարտադրելու համար

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում հատվածներ է հրապարակել Էլչին Ամիրբեկովի հարցազրույցից․

«Ադրբեջանի նախագահի հատուկ հանձնարարություններով դեսպան Էլչին Ամիրբեկովը ֆրանսիական «Le Monde» թերթին տված հարցազրույցում ասել է՝
«120,000 թիվը խիստ չափազանցված է: Մեր տեղեկություններով Ղարաբաղում 50,000 մարդ է ապրում, որոնցից 10,000-ը՝ ՀՀ զինված ուժերն են»:
«Ադրբեջանն առաջարկում է սննդի փոխադրում Ղարաբաղի հայ բնակչության հիմնական մարդասիրական կարիքները բավարարելու համար՝ օգտագործելով նաև Աղդամից և Ֆիզուլիից եկող ճանապարհները: Բայց Ղարաբաղի հայերը կտրականապես հրաժարվում են, և դա դժվար է բացատրել»:
Երբ սոված եք, չպետք է պայմաններ դնեք։ Ինչ տարբերություն, թե որ ճանապարհով է հասնելու այդքան սպասված սննդամթերքը՝ Լաչինով, թե Աղդամից, թե Ֆիզուլիից։ Հիմնական բանը այն է, որ կարողանանք ձեռք բերել անհրաժեշտ ապրանքները: Բայց առկա է հարցի արհեստական քաղաքականացում՝ Ադրբեջանի վրա դրսից ճնշում գործադրելու նպատակով:
Ադրբեջանցի պաշտոնյան ուղղակի խոստովանում է, որ իրենք փակել են Լաչինի միջանցքը իրենց պայմանները Արցախում ապրող հայերին պարտադրելու համար: Այսինքն՝ մարդկանց սոված են պահում՝ ճնշում գործադրելու համար: Նման «խոստովանական» ցուցմունքներ Ադրբեջանում անում են բոլորը՝ Ալիևից սկսած մյուսներով վերջացրած: Ցավոք, ՀՀ իշխանությունները չեն օգտվում այս բացառիկ ցուցմունքներից»։