«Սովորաբար նորմալ երկրներում, նորմալ կառավարությունների պարագայում հենց կառավարությունն է փորձում օրինակ ծառայել, թե ինչպիսին պետք է լինի քաղաքական պրոցեսը, ինչպիսին պետք է լինի քարոզարշավը։ Տվյալ դեպքում քաղաքական պրոցեսների կուլմինացիան հենց քարոզարշավն է։ Եվ ի՞նչ ենք մենք տեսնում Հայաստանում։ Երևի միակ երկիրն է կամ եզակի երկրներից մեկը, որտեղ կառավարությունը ոչ թե փորձում է ձգտել լավագույն ստանդարտներին, այլ ինքն է ներդնում վատագույն ստանդարտները՝ լաչառություն, ֆեյք նորություններ և բազմաթիվ այլ երևույթներ։ Տեսնում եք՝ ինչ է կատարվում․ մարդկանց հետ խոսելու փոխարեն մարդկանց հայհոյում են, սպառնում։ Մի երկու-երեք օր առաջ վարչապետը սպառնաց, որ սպանելու է ինձ և ևս երկու ընդդիմադիր ուժերի առաջնորդների։

Հիմա մարդիկ հասկանում են, որ այս մարդը ամբողջ կյանքում մի դեղին թերթ է ունեցել և հիմա փորձում է այդ դեղին թերթի ոճը տարածել քարոզարշավի վրա։ Սա, իհարկե, բերում է նման կարգի երևույթների։ Բայց մենք պետք է հանգիստ նայենք դրան։ Այդ մարդիկ, որոնք մոլորված են, մեր քաղաքացիներն են, նույնիսկ մեղք են՝ այդ վիճակում են հայտնվել։ Բայց ինչ անենք․ մենք պետք է առաջ գնանք՝ ազատվելով այն կառավարությունից, որը այսպիսի վարք է հաստատում Հայաստանի Հանրապետությունում»,- այս մասին այսօր՝ մայիսի 20-ին, Քասախում քաղաքացիների հետ հանդիպման ընթացքում հայտարարեց ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյան։

Մանրամասն՝ տեսանյութում։