«Առավոտյան 06։30-ից մինչև 19։00-ն չորս հոգով, անակնկալ, խուզարկություն անելու եկան` դատարանի որոշումով, երբ որ ես ընդամենը վկա եմ։ Խուզարկել են ամբողջ բնակարանը»,- «Հրապարակ»-ի հետ զրույցում պատմել է Արագածոտնի թեմի սպասավոր տեր Վրթանես քահանա Բաղալյանը, ում դիմակավորված իրավապահները օրեր առաջ բերման էին ենթարկել ու տարել անհայտ ուղղությամբ: Իրավապահներից մեկը եղել է համազգեստով, մնացածը՝ քաղաքացիական հագուստով:
«Քնահարամ էինք դեռ, փորձում էինք հասկանալ, իրենք արագ-արագ ներկայանում էին»,-պատմել է Տեր Վրթանեսը:
Ժամանել են առանց պետհամարանիշների երկու մեքենաներով, առանց բերման ենթարկելու մասին դատարանի որոշման:
Հիշեցնենք, որ նույն թեմի քահանա Տեր Արամի՝ Հանրային հեռուստաընկերությանը տված հարցազրույցի ժամանակ հնչեցրած մեղադրանքների հիմքով Դանիել Իոաննիսյանը դիմել էր իրավապահներին, որի հիման վրա էր հարուցվել գործը:
«Իրենց ամենից շատ հետաքրքրում էր երևի զենք-զինամթերք գտնելը, որովհետև 44 -օրյա պատերազմի մասնակից եմ: Անհարմար հարց տվեց իրենցից մեկը, թե՝ օրինական զենք էլ չունե՞ս։ Ասացի` փնտրեք, գտեք, եթե կա: Գոնե օրինական զենք էին փնտրում, որ նկարեին ու հրապարակեին․ համացանցային երկիր ենք դարձել: Փնտրեցին, ոչինչ չգտան: Ասացի՝ եթե ձեզ նման բան է հետաքրքրում, 44-օրյայից հետո ինձ տրված բաճկոնն իմ մոտ է, կարող եմ դա տալ: Իրենք դա չեն գտել, ես ինքս եմ առաջարկել, ասացի, որ կարող են վերցնել, բայց հետո փոխանցել Պաշտպանության նախարարությանը: Բացի իմ հեռախոսից, որը թույլ չտվեցին անջատեմ, բարեկամներս, ընկերներս զանգում էին՝ ոչ ոք չէր պատասխանում, պատկերացրեք այդ մարդկանց վիճակը»,- պատմել է Տեր Վրթանեսը:
Տեր Վրթանեսի տնից առգարվվել են երեք համակարգիչների կրիչներ, երեխաների հեռախոսները, կնոջ հեռախոսը, այն դեպքում, երբ երեխաները հեռախոսներն ու համակարգիչներն օգտագործում են սովորելիս, այն դեպքում, երբ Տեր Վրթանեսի կինը ուսուցչուհի է մասնավոր դպրոցում և ծնողների հետ այդ հեռախոսով է կապի մեջ, էլեկտրոնային դասամատյան և այլն:
«Քննչականից երբ վերադարձա, մտածում էի, որ Տեր հայր եմ, մի քիչ պիտի հալածված լինի Տեր հայրը, Քրիստոսին հալածել են, Տեր հայրը ո՞նց կարող է չհալածվի, երբ ինձանից տասը անգամ մեծ վաստակ ունեցող Միքայել Սրբազանն ու Բագրատ Սրբազանը բանտում են. դեռ չգիտեի, որ մեր հարգարժան Մկրտիչ Սրբազանին էլ են նույն ձևով տարել բաժին: Ես վիրավորված եմ ոչ թե, որ իմ հանդեպ են վերաբերվել, այլ, որ ՀՀ քաղաքացիների հետ են այդպես վարվում, հատկապես որ վկայի կարգավիճակ ունես: Ամբողջ կյանքդ համեստ ծառայում ես, մեկ էլ մեկը կարող է անկապ հայտարարություն տալ, մյուսն էլ դրա հիման վրա հայց ներկայացնել, ու վկայի տանը խուզարկություն անեն: Քանի որ գործը փուչիկ է, իրենք փորձում են խուզարկությունների միջոցով գործ սարքել, ու սա այնքան տհաճ է: Նայում ես Քննչականի աշխատողներին՝ շատ մարդկային, կիրթ մարդիկ էին, բայց երբ որ անկիրթներն են նրանց ղեկավարում՝ ամեն ինչ պղտորվում է: Երբ քննիչը քեզ հարցաքննում է հեռախոսով ու կազմած հարցաշարով, այսինքն, անձամբ չի հարցաքննում, քննիչին հարցաշար էին տվել մինչև ինձ քննելը, երբ ես նույնիսկ փաստաբան չեմ պահանջել, չնայած փաստաբան պահանջածներին չէին տրամադրել: Ես հարցերին պատասխանել եմ, որովհետև թաքցնելու բան չունեմ։ Փառք Աստծո, թեմիս առաջնորդը, որին Տեր Արամը վերադաս է ասում, իմ կամքին դեմ երբեք ինձ որևէ հանձնարարություն չի տվել: Ո՞նց կարող է հասուն, չափահաս մարդն ասել, որ ինչ արել եմ՝ վերադասիս հանձնարարականով եմ արել, վախեցել եմ՝ արել եմ: Խնդիրը քո մեջ փնտրիր»,-պատմել է Տեր հայրը:
Իրավական համակարգը վերևից տրված հրահանգներով վարկաբեկում են՝ շեշտել է հոգևորականն ու հավելել, որ այս գործողություններով իշխանությունը ոչ միայն փորձում է հայ եկեղեցին վարկաբեկել, այլև, գործիք դարձնելով իրավապահ համակարգը, վարկաբեկում է հենց նույն այդ իրավապահ համակարգին:
Շարունակությունը՝ սկզբնաղբյուր կայքում
