Թուրքիայի արտաքին գործերի նախարար Հաքան Ֆիդանը շաբաթ օրը հայտնել է, որ Իրանի դեմ «անօրինական հարվածները» տարածաշրջանը մղում են ավելի մասշտաբային պատերազմի, ինչն «անընդհատ բորբոքվում է Իսրայելի կողմից լարվածության սրմամբ», հաղորդել է Anadolu-ն։
Ստամբուլում կայացած 2026թ․ ռազմավարական հաղորդակցությունների (STRATCOM) գագաթաժողովում ելույթ ունենալով՝ Ֆիդանն ասել է. «Մենք մերժում ենք ցանկացած սցենար, որը տարածաշրջանային պետություններին ներքաշում է կործանարար հակամարտության մեջ»։
Նրա խոսքով՝ Իրանի գործողությունները, որոնք ազդում են Պարսից ծոցի երկրների վրա, պարունակում են հենց այդ ռիսկը։
«Եկեք պարզություն մտցնենք։ Սա կարող է լինել պատերազմ, որն ընտրում է Իսրայելը, բայց ամբողջ աշխարհն է վճարում դրա գինը»,- ասել է Թուրքիայի արտաքին գործերի նախարարը։
Ֆիդանը հայտնել է, որ հակամարտության ձգձգմանը զուգընթաց՝ աշխարհաքաղաքական եւ տնտեսական բարդությունները սրվում են սպառնալից արագությամբ։
«Առաջին օրվանից Թուրքիան ընթացել է այդ վտանգավոր հետագծին հակառակ։ Սա Նեթանյահուի քաղաքական գոյատեւման համար կազմակերպված պատերազմ է, բայց, ցավոք, դրա բեռն ընկնում է մնացած աշխարհի վրա»,- ասել է Թուրքիայի արտգործնախարարը՝ զգուշացնելով, որ ճգնաժամը կարող է երկարատեւ սպիներ թողնել տարածաշրջանի ոչ միայն քաղաքներում, այլեւ ժողովուրդների սրտերում եւ մտքերում։
«Մեզ համար կա միայն մեկ իրական ելք։ Դա դիվանագիտությունն է»,- ընդգծել է Ֆիդանը։
Նա նաեւ հայտնել է «Իսրայելի էքսպանսիոնիստական քաղաքականության, մասնավորապես Լիբանանի դեմ նրա վերջին ագրեսիայի վճռական մերժման մասին»։
