«Այստեղ իրավական առումով պետք է տարանջատել մի քանի հարց։ Նախ՝ նախորդիվ դատարանը չէր արձանագրել հիմնավոր կասկածի առկայությունը, իսկ ներկայումս հավելյալ տեղեկություններ չեն ներկայացվել, որոնք կհաղթահարեին դատարանի նախկին որոշմամբ արձանագրվածը։
Այսինքն՝ դատարանը հերքել էր Սեդրակ Քոչարյանի առնչությունն իրեն մեղսագրվող յոթ դրվագներից հինգին։ Դա նշանակում է, որ այդ դրվագներով պետք է ներկայացվեին լրացուցիչ տվյալներ, բայց դրանք չեն ներկայացվել։ Ասելիքս սա է։ Այդ հինգ դրվագների մասով հարցը նաև վերաքննության կարգով ստուգման է ենթարկվել, և որոշումը մնացել է նույնը։ Հետևաբար այդ մասով պետք է ներկայացվեին հավելյալ տվյալներ, որոնք ներկայումս չունենք»,- այս մասին դատարանի բակում լրագրողների հետ զրույցում հայտարարեց Սեդրակ Քոչարյանի փաստաբան Ալեքսանդր Կոչուբաևը՝ նշելով, որ Հայաստանի երկրորդ նախագահ Ռոբերտ Քոչարյանի որդու՝ Սեդրակ Քոչարյանի նկատմամբ խափանման միջոցի վերաբերյալ Հակակոռուպցիոն դատարանի որոշումը կհրապարակվի վաղը՝ ժամը 10-ին։
Մանրամասն՝ տեսանյութում։
