«Փաստ»-ը գրում է, որ համապետական ընտրություններին մասնակցած 18 ուժերից 7-ը դիմել է ՍԴ՝ վիճարկելով ընտրությունների արդյունքներն ու ԿԸՀ որոշումը. «Ուժեղ Հայաստան», «Հայաստան», «Բարգավաճ Հայաստան», «Միասնության թևեր», «Դեմոկրատիա Օրենք Կարգապահություն», «Նոր ուժ» և «Հանուն Հանրապետության ժողովրդավարության պաշտպանների դաշինքը»: ՍԴ-ն դիմումները միավորել է և կքննի հունիսի 26-ին՝ բանավոր ընթացակարգով։
Թերթի տվյալներով՝ եթե հաշվի չառնվեն ՔՊ-ն ու «սատելիտները», ապա հունիսի 7-ի արդյունքները վիճարկում է ուժերի կեսից ավելին, որոնք, ըստ ԿԸՀ տվյալների, ստացել են շուրջ 630 հազար քվե։
«Փաստ»-ի փոխանցմամբ, Վլադիմիր Վարդանյանն ու Արտակ Զեյնալյանը չեն մասնակցի գործի քննությանը, իսկ «Հայաստան»-ը դիմում կներկայացնի, որպեսզի Սեդա Սաֆարյանն ևս չմասնակցի։ Թերթը նաև նշում է, որ գիշերում ամփոփումը ընդհատվել է, առավոտյան հրապարակվել են թվերը, զրոյացվել են 3 տեղամասերի արդյունքներ և մերժվել է վերաքվեարկությունը։
