Ռուսաստանի նախագահ Վլադիմիր Պուտինը չի ցանկանում դադարեցնել պատերազմն Ուկրաինայի դեմ, բայց նա ստիպված կլինի դա անել: Մշակվել է համապատասխան ծրագիր: Այս մասին հայտարարել է Ուկրաինայի նախագահ Վլադիմիր Զելենսկին Ուկրաինայի երիտասարդական ֆորումում:
Զելենսկին հայտարարել է, որ բոլոր քայլերը հաշվարկված են:
«Մենք հասկանում ենք, թե ինչ պետք է անենք: Սա մեր գործընկերների հետ համատեղ ծրագիր է, թե ինչպես ճնշում գործադրել նրա վրա», — ասել է Ուկրաինայի նախագահը:
Զելենսկիի խոսքով՝ Ուկրաինայի պաշտպանության ուժերը պետք է ցանկացած դեպքում պահեն ճակատը:
«Սա նախագահին հնարավորություն է տալիս ուժեղ երկխոսություն վարել թշնամու հետ»,- ասել է նա:
Երբ մարտադաշտում իրավիճակը բավականաչափ ուժեղ չէ, երկխոսությունը վերածվում է չափազանց մեծ զիջումների, ինչը չի համապատասխանում Ուկրաինայի շահերին, կարծում է Զելենսկին:
Նա ընդգծել է, որ Ուկրաինայի գլխավոր ռազմավարությունն այժմ Պուտինի ռազմավարությանը հակազդելն է:
Զելենսկին նաև հիշեցրել է, որ Ռուսաստանի նախագահը նախատեսում է մեծացնել զորահավաքը և որքան հնարավոր է շատ մարդկանց ներգրավել բանակ։
Հետևաբար, Ուկրաինայի առաջնորդը կոչ է արել Ուկրաինայի միջազգային գործընկերներին` ընդլայնել իրենց աջակցությունը, մասնավորապես՝ ՀՕՊ ոլորտում։ Նա Պաշտպանության ուժերի խնդիրների շարքում նշել է պատասխան հարվածները։
«Մենք պետք է պատերազմը վերադարձնենք Ռուսաստանի տարածք։ Դրանից հետո ռուսական հասարակությունը կզգա այս պատերազմի հետևանքները և ճնշում կգործադրի կառավարության վրա», — եզրափակել է Զելենսկին։
