«ՊԵՏՈՒԹՅԱՆ ԵՎ ԵԿԵՂԵՑՈՒ ՓՈԽՀԱՐԱԲԵՐՈՒԹՅՈՒՆՆԵՐԸ. ԱՐԴԻ ՀԻՄՆԱԽՆԴԻՐՆԵՐԸ» ՀԱՄԱԺՈՂՈՎԻ ՄԱՍՆԱԿԻՑՆԵՐԻ
ՀԱՅՏԱՐԱՐՈՒԹՅՈՒՆԸ

16.06.2025թ.

Երկրի գործադիր իշխանության ղեկավարը՝ իրեն հարող անձանց հետ, հերթական անգամ թիրախ է դարձրել Հայաստանյայց Առաքելական Սուրբ Եկեղեցին՝ հընթացս Ամենայն Հայոց Կաթողիկոսի և բարձրաստիճան եկեղեցականների նկատմամբ հրապարակայնորեն հնչեցնելով սպառնալիքներ, արժանապատվությունը վիրավորող ու մարդու իրավունքները ոտնահարող արտահայտություններ՝ միաժամանակ կոպտորեն խախտելով հանրային էթիկայի նորմերը:

Տարածաշրջանում ընթացող ռազմական գործողությունների և մեր անմիջական հարևանությամբ ծավալվող խիստ վտանգավոր զարգացումների պայմաններում փոխանակ լծվելու երկրի առջև ծառացած լրջագույն մարտահրավերների դիմագրավմանը և պետական ու հանրային դիմադրողականության ամրապնդմանը, ուղղակի ողբերգական է, որ Հայաստանի իշխանությունները քայքայիչ գործողություններ են իրականացնում հենց ներազգային կյանքում՝ Եկեղեցու դեմ:

Փաստացի, նախաձեռնված է Եկեղեցու դեմ ատելություն հրահրելու իշխանության արշավ, որն ունի համակարգված բնույթ և տեղի է ունենում վարչապետի կարգավիճակի անօրինական գործադրմամբ կամ չարաշահումով:

Այս գործողություններն ակնհայտորեն հակասահմանադրական են, որևէ ձևով չեն համադրվում Եկեղեցու և կրոնական կազմակերպությունների գործունեությունը չխոչընդոտելու վերաբերյալ օրենսդրական պահանջների հետ: Դրանք կոպտորեն ոտնահարում են մարդու անձնական կյանքի իրավունքի պաշտպանության միջազգայնորեն ճանաչված և ՀՀ Սահմանադրությամբ երաշխավորված պահանջները:

Եկեղեցին ունի իր ներքին կառավարման իրավունքը՝ դարերի ընթացքում ձևավորված կանոններով ու սրբազան ավանդույթներով, և որևէ պետական մարմին կամ պաշտոնյա Եկեղեցու ներքին հարցերին միջամտելու իրավասություն չունի:

Եկեղեցականներին վարկաբեկելու միջոցով նախաձեռնված այս անօրինական գործողություններն ուղղված են եկեղեցու և ազգային շահերի դեմ, որոնք խորացնում են հանրության մեջ պառակտումն ու բաժանարար գծերը՝ թուլացնելով և վերացնելով պետության դիմադրողականությունը, ինչն ի վերջո հանգեցնելու է պետականության կորստի:

Խիստ մտահոգիչ ու վտանգավոր ենք համարում հատկապես, որ Հայաստանի իշխանությունների հակաեկեղեցական խոսույթն ուղղակիորեն զուգահեռվում է ադրբեջանական իշխանության քարոզչական կեղծ թեզերի ու պատումների հետ:
Հայաստանյայց Առաքելական Սուրբ Եկեղեցին մեր հավատքի, ինքնության ու միաբանության միջնաբերդն է, մեր ազգի գոյության հենասյունը:

Հարվածել Եկեղեցուն, փորձել վարկաբեկել Սրբազան այս հաստատությունը՝ նշանակում է խարխլել երկրի անվտանգությունը և սպասարկել հակահայկական ուժերի շահերը:

Սահմանադրական իրավասու մարմիններից պահանջում ենք, որ համարժեք միջոցներ ձեռնարկեն՝ վարչապետի և նրան հարող անձանց հակաօրինական քայլերն անհապաղ կանխարգելելու և արձանագրված դեպքերի առնչությամբ համապատասխան հակազդեցության միջոցներ կիրառելու նպատակով:

Որպես Եկեղեցու նվիրյալ զավակներ` մենք հնարավոր իրավական բոլոր միջոցներն օգտագործելու ենք ապահովելու համար մեր Սուրբ Եկեղեցու ու ազգային նվիրական արժեքների իրավական պաշտպանությունը և զերծ պահելու դրանք բոլոր տեսակի ոտնձգություններից:

Աստված պահապան մեր ժողովրդին, մեր Սուրբ Եկեղեցուն և մեր Հայրենիքին:

Գևորգ Դանիելյան Gevorg Danielyan
Արման Թաթոյան Arman Tatoyan
Ռուբեն Մելքոնյան Melkonyan Ruben
Վարուժան Գեղամյան Варужан Гегамян
Գագիկ Ղազինյան
Հայկ Ալումյան Hayk Alumyan
Վարդան Պողոսյան
Վարդան Այվազյան Vardan Ayvazyan
Սիմոն Բաբայան Simon Babayan
Ալվինա Գյուլումյան Alvina Gyulumyan
Արմինե Ֆանյան Армине Фанян
Լարիսա Ալավերդյան
Դավիթ Անանյան Davit Ananyan
Տարոն Սիմոնյան Taron Simonyan
Արտակ Ապիտոնյան Artak Apitonian
Սիրանուշ Սահակյան
Արա Զոհրաբյան

* Հայտարարությունը բաց է միանալու համար