ԱԺ «Հայաստան» խմբակցության պատգամավոր Սևակ Խաչատրյանի ֆեյսբուքյան գրառումը․ «Այսօր Արցախի հայաթափման տարելիցն է…
Օրը, երբ հազարավոր հայեր ստիպված եղան թողնել իրենց հայրենի տները, եկեղեցիները, պապերի գերեզմաններն ու այն հողը, որի վրա դարերով ապրել ու արարել էին։
Այսօր մեր պարտքն է ոչ միայն հիշել, այլև չթողնել, որ Արցախը դառնա փակված էջ։
Արցախահայության իրավունքների պաշտպանությունը պետք է լինի մեր պետական և ազգային օրակարգի մշտական առաջնահերթությունը։
Մենք պետք է հետևողականորեն պաշտպանենք արցախահայերի՝ իրենց իրավունքների, սեփականության և անվտանգ ու արժանապատիվ վերադարձի միջազգային երաշխիքների պահանջը։
Պետք է պահպանենք Արցախի պատմամշակութային ժառանգության մասին ճշմարտությունը և թույլ չտանք, որ դարերի հայկական ներկայությունը ջնջվի քաղաքական հայտարարություններով կամ պատմության վերաշարադրմամբ։
Բայց այս ողբերգությունից մենք պարտավոր ենք նաև ամենակարևոր հետևությունն անել Հայաստանի համար։
Ուժեղ պետությունը շքեղություն չէ։ Այն գոյության պայման է։
Պետություն, որն ի վիճակի չէ պաշտպանել իր ժողովրդին, վաղ թե ուշ կանգնելու է նոր կորուստների առաջ։
Ուստի մեր պայքարը միայն անցյալի համար չէ։
Այն Հայաստանի անվտանգ, ինքնիշխան և ուժեղ ապագայի համար է։
Խոնարհում Արցախի համար կյանքը զոհած մեր քաջերի հիշատակին։
Արցախցիների իրավունքները չեն կարող լինել մեկ օրվա հիշատակի թեմա։
Դրանք պետք է լինեն մեր քաղաքական օրակարգի մշտական մաս։
Արցախը մեր հայրենիքն է, մեր սրտերում է և հոսում է մեր երակներով…»։
