Արցախցիների դժգոհությանն ի պատասխան՝ ՆԳՆ-ն գովազդում է նոր անձնագրերի «անվտանգությունն ու հուսալիությունը»։
Բռնի տեղահանված արցախցիների շրջանում դժգոհության ալիք է բարձրացել նոր կենսաչափական անձնագրերում ծննդավայրի դիմաց «Ադրբեջան» գրառման պատճառով։ Խնդրին անդրադարձել են տարբեր անհատներ ու կազմակերպություններ՝ դատապարտելով նման մոտեցումը և բարձրաձայնելով դրա հետ կապված մտահոգությունները։
Սակայն, այս իրավիճակում, ՆԳՆ-ն ոչ թե արձագանքում է բարձրացված մտահոգություններին, այլ հրապարակում է նոր կենսաչափական անձնագրերի գովազդային տեսանյութ՝ ներկայացնելով դրանց ժամանակակից տեսքը, հուսալիությունն ու անվտանգության համակարգերը։
«Ոմանց գրավում է անձնագրի ժամանակակից տեսքն ու որակը, մյուսների համար կարևոր է փաստաթղթի հուսալիությունն ու անվտանգային բաղադրիչը»,- ասվում է տեսանյութում։
Ըստ ՆԳՆ-ի՝ ՀՀ նոր անձնագիրը պարզապես նոր ձևաչափի փաստաթուղթ չէ, այլ անվտանգության, հուսալիության և տեխնոլոգիական առաջընթացի նոր մակարդակ, ՀՀ քաղաքացու ինքնության և պետականության միասնական խորհրդանիշ։






