Կառավարությունը պատրաստվում է Մայր աթոռին անհատույց սեփականությամբ հողեր այլևս չտալ։ Հարցը ներառված է կառավարության նիստի վաղվա օրակարգում։
«Հայաստանի Հանրապետության հողային օրենսգրքում փոփոխություն կատարելու մասին» օրենքում փոփոխություններ կատարելու մասին նախագծով ուժը կորցրած է ճանաչվում Օրենքի համապատասխան հոդվածը, որը սահմանում է՝ պետության և համայնքների սեփականության հողամասերը սեփականության իրավունքով անհատույց տրամադրվում են Մայր աթոռ Սուրբ Էջմիածնին` եկեղեցիների և եկեղեցապատկան կառույցների շինարարության ու դրանց սպասարկման համար, և մնում է միայն անհատույց օգտագործման իրավունքը:
Նախագիծը մշակվել է ՀՀ տարածքային կառավարման և ենթակառուցվածքների նախարարության կողմից: Ըստ նախագծի՝ այն բխում է Հայաստանի Հանրապետության կառավարության 2021-2026 թվականների գործունեության միջոցառումների ծրագրից, հողային ռեսուրսների նպատակային և ջրային ռեսուրսների խնայողական ու արդյունավետ օգտագործում պահանջներից և հիմնական նպատակն է հողերի օգտագործման արդյունավետության բարձրացումը։
