«Այս դահլիճի ճնշող մեծամասնությունը ինձ ճանաչում է նախորդ գումարումից և, բնականաբար, քաջատեղյակ է այն ծանր քաղաքական գնահատականներին, որ հնչեցրել եմ Հայաստանում մարդու իրավունքների համատեքստում։ Նիստում դրանք դրսևորվել են գլխավոր դատախազի, Մարդու իրավունքների պաշտպանի տարեկան զեկույցների քննարկման, նաև այլ քաղաքական օրակարգերի շրջանակներում։
Ցավոք, գնահատականներս ոչ միայն չեն փոխվել, այլև երկրում տիրող ամենաթողության, անպատժելիության, խորացող ավտոկրատիայի համապատկերում վերածվել են երկրի սահմանադրական կարգին ուղղված լրջագույն սպառնալիքի։
Պիտի ընդգծեմ, որ Հայաստանում մարդու իրավունքների պաշտպանության իրավական հիմքերը բավական ուժեղ են։ Սահմանադրությունը մարդուն, նրա արժանապատվությունը, իրավունքներն ու ազատությունները հռչակում է բարձրագույն արժեք։ Ավելին, հանրային իշխանությունն ինքն է սահմանափակված մարդու իրավունքներով։
Հայաստանը նաև ՄԱԿ-ի մարդու իրավունքների հիմնական համակարգի, Եվրոպայի խորհրդի և Մարդու իրավունքների եվրոպական կոնվենցիայի համակարգերի մասնակից է։
Բայց իրական ժողովրդավարությունն ու իրավունքը որոշվում են ոչ թե Սահմանադրության գեղեցիկ ձևակերպումներով կամ կոնվենցիաներով, այլ այն պահին, երբ քաղաքացին առերեսվում է պետության ուժին։ Այն, ինչի հետ հայ մարդն ու հայ հասարակությունը բախվում են ամեն օր, աղերս չունի ոչ իրավական և ոչ էլ ժողովրդավարական պետության հետ»,- այս մասին այսօր՝ օգոստոսի 18-ին, հայտարարեց ԱԺ «Հայաստան» խմբակցության պատգամավոր Լիլիթ Գալստյանը։
Մանրամասն՝ տեսանյութում։
