«Այսօր համազգային սգո օր է, որովհետև Արցախը միայն արցախցիների հայրենիքը չէր։ Արցախը նաև ամբողջ հայության հայրենիքն էր, ամբողջ հայության հպարտությունը և վերջին տասնամյակների, առնվազն, եթե ոչ հարյուրամյակի, գլխավոր ձեռքբերումն ու հաղթանակը։

Ես Արցախը հիշում եմ միայն որպես հաղթանակած և երբեք՝ ծնկած, և արցախցիներին ընկալում եմ միայն որպես հաղթանակած և ոչ երբեք՝ ծնկած։

Այսօր, այո՛, սուգ է։ Այսօր, այո՛, մենք հիշում ենք մեր հերոսների վերջին պատվո մարտը, ովքեր մինչև վերջին փամփուշտը կանգնել են՝ պաշտպանելու հայրենիքը, որովհետև թիկունքում արդեն իրենց ընտանիքներն էին, արդեն նահանջի տեղ չկար։

Մենք եկել ենք այստեղ նրանց հիշելու, ասելու, որ ինչ էլ ասեն որոշ մարդիկ՝ ներսից կամ դրսից, մենք նրանց պարտական ենք, և մենք իրենց հիշողությունը միշտ վառ ենք պահելու։

Այսօր արցախցիների սոցիալական խնդիրներն այնքան շատ են, այնքան շատ, որ դրսերում մնացած խեղճ արցախցիներն արդեն չգիտեն, թե որ դուռը ծեծեն։ Սա նաև համարում եմ պետական հատուկ քաղաքականություն, որպեսզի արցախցիները ստիպված լքեն նաև Հայաստանը։

Չկա Արցախ, չկան արցախցիները Հայաստանում, չկա արցախյան էջը։ Ես այսպես եմ մեկնաբանում»,- այս մասին այսօր՝ սեպտեմբերի 19-ին, լրագրողների հետ զրույցում նշեց ԱԺ «Ուժեղ Հայաստան» խմբակցության պատգամավոր Արեգա Հովսեփյանը։

Մանրամասն՝ տեսանյութում։