Ռուսաստանն ակտիվորեն աջակցում է «3+3» ձևաչափին։ Այս մասին հայտարարել է Ռուսաստանի ԱԳ նախարար Սերգեյ Լավրովը՝ Ասիայում փոխգործակցության և վստահության ամրապնդման միջոցառումների խորհրդակցության գագաթնաժողովից հետո։
«Կցանկանայի հիշատակել Ադրբեջանի և Թուրքիայի նախաձեռնած «3+3» ձևաչափը՝ Ադրբեջան, Վրաստան, Հայաստան, ինչպես նաև Ռուսաստան, Թուրքիա և Իրան։ Մենք մի քանի անգամ հանդիպել ենք, և այժմ սպասում ենք, որ Հայաստանն ու Ադրբեջանը պայմանավորվեն, թե ով է հաջորդը հյուրընկալելու այս խմբի արտաքին գործերի նախարարների հանդիպումը»,- ասել է ՌԴ ԱԳ նախարարը։ «Կարծում եմ՝ առաջիկա հանդիպումը կարելի է անցկացնել Ադրբեջանում, իսկ հաջորդը՝ Երևանում։ Դա ճիշտ կլիներ»,- հավելել է նա։
«Ես այս ձևաչափը հիշատակում եմ, քանի որ այն իսկապես համապարփակ է և նվիրված չէ որևէ առանձին նախագծի, որը նախատեսվում է իրականացնել տարածաշրջանային համատեքստից դուրս։ Այդ պատճառով մենք ակտիվորեն աջակցում ենք Ադրբեջանի և Թուրքիայի առաջարկած «3+3» ձևաչափին»,- հայտարարել է Լավրովը։
