Իրանի խորհրդարանի խոսնակ Մոհամմադ Բաղեր Ղալիբաֆը ծաղրել է ԱՄՆ-ի՝ վերջերս հայտարարված Իրանի նկատմամբ պատժամիջոցային ճնշումն ուժեղացնելու քաղաքականությունը՝ հայտարարելով, որ ԱՄՆ նախագահ Դոնալդ Թրամփն իրականում ձգտում է «Ամերիկան կրկին սոված դարձնել»։
X սոցիալական ցանցում կատարած հրապարակման մեջ Ղալիբաֆը ծաղրել է ամերիկյան նախագահի նախընտրական «Make America Great Again» («Եկե՛ք Ամերիկան կրկին մեծ դարձնենք») կարգախոսը։
Իրանի խորհրդարանի ղեկավարը արձագանքել է Թրամփի հրապարակմանը, որտեղ վերջինս տեղադրել էր Ղալիբաֆի՝ Իրանի տնտեսության վիճակի մասին ելույթի խմբագրված հատվածը։ Ի պատասխան՝ նա ԱՄՆ նախագահին դիմել է հետևյալ խոսքերով․ «Եկե՛ք Ամերիկան կրկին սոված դարձնենք»։
Ղալիբաֆը նաև հրապարակել է ԱՄՆ-ում աղքատության և պարենային անապահովության վերաբերյալ տվյալներով պատկեր, գրելով․ «47 միլիոն ամերիկացիներ սոված են, և այս թվերը կեղծ չեն, ինչպես ձեր հայտարարությունները»։
Պատկերում ներկայացված տվյալների համաձայն՝ ԱՄՆ-ում շուրջ 47 միլիոն մարդ բախվում է սովի և պարենային անապահովության։ Սա նշանակում է, որ մոտավորապես յուրաքանչյուր ութերորդ ամերիկացին դժվարություններ ունի բավարար սնունդ ապահովելու հարցում։
Բացի այդ, հրապարակման մեջ նշվում է, որ մոտ 16 միլիոն ամերիկացի երեխաներ այն մարդկանց թվում են, ովքեր տառապում են աղքատությունից և կյանքի թանկացման ճգնաժամից։
