Դե կներեք էլի, որ ձեր նման երջանիկ չենք, դե կներեք էլի, որ չենք հաշտվում Արցախը կորցնելու հետ, չենք հաշտվում 5000 զոհերի հետ: Այս մասին հայտարարեց «Հայաստան» խմբակցության պատգամավոր Էլինար Վարդանյանը՝ դիմելով ՔՊ-ական պատգամավորներին։
Մասնավորապես, ՔՊ խմբակցության պատգամավոր Ջուլիետա Ազարյանն իր ելույթում ասել էր․ «Տպավորություն ունեմ, որ ընդդիմության որոշ ներկայացուցիչներ փոքր տարիքում հաճախել են վշտի և դժբախտության խմբակ»։
«Ի՞նչ վշտի և դժբախտության մանկապարտեզի մասին եք խոսում, էդ վիշտն ու դժբախտությունն էս երկրի գլխին բերել է ձեր իշխանությունը, և հիմա ընդդիմությանը դասեր եք տալիս, որ վշտի և դժբախտության մասին ենք խոսո՞ւմ»,- ասաց Էլինար Վարդանյանը։
Նա իր ելույթում անդրադարձավ Հայաստանի ժողովրդավարությանը, նշեց, որ Հայաստանում հեղափոխական ժողովրդավարությունը հենվում է կալանքի վրա։
«Եվ որքան էլ ԵԽԽՎ ամբիոնից բարձրաձայն խոսեն հայկական ժողովրդավարության մասին, բուն Հայաստանում ժողովրդավարությունը դա կալանքն է, ժողովրդավարությունը կալանք պահանջող քննիչներն ու դատախազներն են, ժողովրդավարությունը կալանք տվող դատավորներն են։ Եվ տարիներ անց Հայաստանի այս փուլը հիշվելու է որպես պարտության և կալանքի փուլ։ Երբ բանտերում գտնվում են երկու արքեպիսկոպոս՝ ընդ որում՝ իրավական տեսանկյունից փնթի ու կարված գործերով, դա ժողովրդավարության անկում է»,- նշեց Էլինար Վարդանյանը։
Մանրամասն՝ տեսանյութում։
