Թուրքիայի նախագահ Ռեջեփ Թայիփ Էրդողանը հայտարարել է, որ Եվրամիությունը իրական մտադրություն չունի Թուրքիային իր կազմում ընդունելու։ Նա այդ մասին խոսել է Al Jazeera-ին տված հարցազրույցում՝ անդրադառնալով Անկարայի և Բրյուսելի երկարամյա հարաբերություններին։
Էրդողանի խոսքով՝ ԵՄ-ին անդամակցությունն այս պահին Թուրքիայի առաջնահերթություններից չէ։ Նա նշել է, որ անդամակցության գործընթացի երկարատև ձգձգման պայմաններում հիմնական կորուստը կրում է հենց Եվրոպան, քանի որ Թուրքիան կարևոր դեր ունի տարածաշրջանային անվտանգության, տնտեսության, էներգետիկայի և աշխարհաքաղաքական գործընթացներում։
Թուրքիայի նախագահը նաև շեշտել է, որ Անկարան շարունակում է զարգացնել հարաբերությունները եվրոպական երկրների հետ, սակայն երկրի արտաքին քաղաքականությունը չի սահմանափակվում միայն Եվրամիությանը անդամակցելու հեռանկարով։
Թուրքիան ԵՄ անդամակցության թեկնածուի կարգավիճակ ունի 1999 թվականից, իսկ պաշտոնական բանակցությունները մեկնարկել են 2005 թվականին, սակայն վերջին տարիներին գործընթացը փաստացի կանգ է առել։
