Եվրամիությունը սկսել է Մոլդովայի, Ուկրաինայի և Հայաստանի՝ միությանը միանալու ծրագրերի մշակումը։ Այդ ծրագրերն անմիջականորեն առնչվում են Ռուսաստանի ռազմավարական անվտանգությանը։ Այս մասին ՏԱՍՍ- փոխանցմամբ՝ հայտարարել է Ռուսաստանի Դաշնության Դաշնային խորհրդի միջազգային հարցերի կոմիտեի նախագահի առաջին տեղակալ Գրիգորի Կարասինը։
«Մենք պետք է հաշվի առնենք Եվրամիության՝ հերթական ընդլայնման հավակնությունները։ Այնտեղ սկսել են այնպիսի պետությունների, ինչպիսիք են Մոլդովան, Ուկրաինան, ինչպես նաև Հայաստանը, միությանն անդամակցելու ծրագրերի մշակումը։ Այս ծրագրերն անմիջականորեն առնչվում են մեր հայրենիքի ռազմավարական անվտանգությանը», — ասել է նա՝ Դաշնային խորհրդի միջազգային հարցերի կոմիտեի և պաշտպանության ու անվտանգության կոմիտեի համատեղ կլոր սեղանի ընթացքում։ Քննարկման թեման էր «Ռուսաստանի Դաշնության ազգային անվտանգության սպառնալիքները՝ Եվրամիության ռազմականացման համատեքստում»։
Նա հիշեցրել է, որ ավելի վաղ ԵՄ արտաքին գործերի ծառայության ղեկավար Կայա Կալլասը հայտարարել էր, թե Մերձդնեստրի հակամարտությունը «խոչընդոտ չէ Մոլդովայի՝ Եվրամիությանն անդամակցելու համար»։
«Դրանով իսկ հայտարարվել է մի պետությանն անդամակցություն ապահովելու պատրաստակամության մասին, որի տարածքում, համաձայն 1992 թվականի խաղաղ կարգավորման սկզբունքների մասին համաձայնագրի, տեղակայված են ռուս զինծառայողներ։ Նման պայմաններում Մոլդովայի անդամակցությունը Եվրամիությանը նույնպես սպառնում է մեր երկրի և Եվրամիության միջև ուղղակի հակամարտությամբ», — ասել է սենատորը՝ նշելով, որ նման իրավիճակ կարող է ստեղծվել նաև այն դեպքում, եթե «Եվրամիությունը կլանի ներկայիս Ուկրաինան»։
Խորհրդարանականի խոսքով՝ ներկայումս Եվրամիությունը Ռուսաստանի Դաշնության հետ տարածքային հակամարտություն չունի։ Սակայն նման հակամարտություն կարող է առաջանալ, «եթե Եվրոպայում ընդունեն Ուկրաինային՝ չճանաչելով Դոնեցկի և Լուգանսկի Ժողովրդական Հանրապետությունների, Խերսոնի և Զապորոժիեի մարզերի, ինչպես նաև Ղրիմի և Սևաստոպոլի բնակչության՝ Ռուսաստանի կազմի մեջ մտնելու կամքը»։
«Հիշեցնեմ, որ եվրոպացիները հայտարարում են Ուկրաինա իրենց զորքերն ուղարկելու պատրաստակամության մասին, ինչը, բնականաբար, հղի է մեզ հետ ուղղակի առճակատմամբ։
Ինչպես նշել է Ռուսաստանի Դաշնության նախագահ Վլադիմիր Պուտինը. «Ռուսաստանը չի սպառնում և մտադիր չէ սպառնալ եվրոպական երկրներին»։
Եվրոպական երկրների ժողովուրդները նույնպես սկսում են հասկանալ դա, ինչի մասին է վկայում, մասնավորապես, որոշ ընդդիմադիր կուսակցությունների ժողովրդականությունը, այդ թվում՝ Գերմանիայում և Ֆրանսիայում։
Հույս ենք հայտնում, որ Եվրամիության խոշորագույն պետություններում շրջադարձ կկատարվի դեպի ողջամտություն», — ասել է Կարասինը։
