Մենք խորը մտահոգություն ենք հայտնում Մերձավոր Արևելքում լարվածության վտանգավոր սրման վերաբերյալ և խստորեն դատապարտում ենք Իսրայելի պետության կողմից հունիսի 13-ի գիշերը ՄԱԿ-ի կանոնադրության և միջազգային իրավունքի խախտմամբ ձեռնարկված ռազմական գործողությունները: Այս մասին ասվում է Ռուսաստանի արտաքին գործերի նախարարության հայտարարության մեջ:
«ՄԱԿ-ի ինքնիշխան անդամ պետության, նրա քաղաքացիների, քնած խաղաղ քաղաքների, միջուկային էներգիայի ենթակառուցվածքների օբյեկտների վրա չհրահրված ռազմական հարվածները կտրականապես անընդունելի են։ Միջազգային հանրությունը չի կարող անտարբեր լինել նման վայրագությունների նկատմամբ, որոնք ոչնչացնում են խաղաղությունը և վնասում տարածաշրջանային և միջազգային անվտանգությանը»,- նշել է ՌԴ ԱԳՆ-ն։
Իր հերթին Թուրքիայի իշխող «Արդարություն և զարգացում» կուսակցության խոսնակ Օմեր Չելիքը Իսրայելի հարձակումը Իրանի տարածքի վրա անվանել է «բարբարոսական և անօրինական»։ Նա ընդգծել է, որ Իսրայելը որևէ արդարացում չունի նման գործողությունների համար և միջազգային հանրությանը կոչ է արել միասնական արձագանք մշակել ի պատասխան այս ագրեսիայի։
Լուրջ մտահոգություն է հայտնել նաև Չինաստանը՝ նշելով․ «Չինաստանը դեմ է Իրանի ինքնիշխանության, անվտանգության և տարածքային ամբողջականության նկատմամբ ոտնձգություններին, հակասությունների սրմանը և հակամարտության ընդլայնմանը»։
