ՌԴ պետդումայի խոսնակ Վյաչեսլավ Վոլոդինի խոսքով, ՀՀ վարչապետ Նիկոլ Փաշինյանի գործողություններն ու որոշումները, որոնք ուղղված են Եվրամիության հետ մերձեցմանը, հանգեցնում են հանրապետությունում հասարակության պառակտմանը, որը լի է լուրջ խնդիրներով, փոխանցում է «Ինտերֆաքս»-ը։
«Այս ամենը հանգեցնում է հասարակության պառակտման։ Եվ, թերևս, սա ամենամեծ կորուստն է, որը կարող է կրել Հայաստանը՝ միասնության կորուստը», – շաբաթ օրը իր Max ալիքում գրել է Վոլոդինը՝ մեկնաբանելով հարցը, թե ի՞նչ կարող են նշանակել Փաշինյանի գործողություններն ու հայտարարությունները Հայաստանի համար։
Պետդումայի խոսնակը նշել է, որ հենց այստեղ է, որ շատ երկրներում սկսվել են լուրջ խնդիրներ․ «Եվ այստեղ կրկին անխուսափելիորեն մտքիս է գալիս զուգահեռը Ուկրաինայի և այնտեղ 2014 թվականի իրադարձությունների հետ։ Կարող ենք հիշել նաև Բալթյան երկրները, որոնք ձգտում էին միանալ Եվրամիությանը, բայց, ինչպես ցույց տվեց ժամանակը, դրանից ավելի երջանիկ չէին», – գրել է Վոլոդինը։
Նա նաև ներկայացրել է թվեր, որոնք «ինքնին խոսուն են»։ Օրինակ՝ Հայաստանի՝ Եվրամիությանը միանալու ձգտման մասին խոսակցությունների ֆոնին, «մեր երկրի հետ առևտրաշրջանառությունը կտրուկ նվազել է՝ 45.4%-ով 2025 թվականին, և այս բացասական միտումը շարունակվում է», – նշել է նա: Վոլոդինի խոսքով, «Ռուսաստանի քաղաքացիները, որոնք աշխատում են Հայաստանում և այնտեղ բիզնեսներ են ստեղծում, սկսել են փակել իրենց բիզնեսը և հեռանալ՝ ապագայի վերաբերյալ անորոշության և առաջացող հնարավոր խնդիրների պատճառով»։
«Մասնագիտական գնահատականների համաձայն՝ Հայաստանի դուրս գալը ԵԱՏՄ-ից կարող է նրան արժենալ ՀՆԱ-ի 15-20%-ի կորուստ՝ առնվազն 5 միլիարդ դոլար», – կարծում է Պետդումայի նախագահը: Նրա կարծիքով՝ «սա միայն մակերեսային պատկերն է»։
«Ավելի մեծ կորուստներ կլինեն: Եվ դրանցից ոչ բոլորը կապ ունեն ֆինանսականի հետ: Մենք արդեն տեսնում ենք պատմությունը վերաշարադրելու և ազգային ու ավանդական հիմքերը խաթարելու փորձեր: Արևմտյան լիբերալ արժեքները պարտադրվում են հայ ժողովրդին, իսկ եկեղեցին հալածվում է», – նշել է Վոլոդինը։
«Ճանապարհի ընտրությունը, առաջին հերթին, ժողովրդի կամքի վրա հիմնված ընտրություն է։ Անկախ նրանից, թե քաղաքական գործիչը ինչ պաշտոն է զբաղեցնում, նա պետք է առաջնորդվի դրանով», – գրել է Պետդումայի խոսնակը։
